السلام عليكم ورحمه الله وبركاته
أمنية في حقيبة سفر .. ونزف موجع !
لشاعره /
هُجوس
ما هيب تنفع قطـرة العين للـعين=مـا دام فــ الخـافق ضـِـويّ المواجع !
ضو ٍ تسلسل لك على فوق مترين=وتـْـرد لك مترين عـكس بْـتـراجــع !
والثانيـه تُــوقَـد لَـيّ على ضلعيـن=مـا آظنّ أحصّـل وصفهـا فـ المـراجع !
والثالثه .. والرابعه .. ألف .. ألفين=سوّن ورى هدْف الضلـوع المضاجع !
هم ٍ تحمّـلته من سْنيــن وسْنين=غــدا طبيعــي لـو طبيعَتْه فـاجع !
غيّر مفاهيم ٍ و قـلّب مــوازيـن=وآحسّني من سطوته في تراجـع !
مرّات ما أواجع على شيّ هُب زين=ومرّات من غير أيّة أسباب أواجع !!
كنّي غديت المدهَل الزيـن للبــين= وإلا عيــاده .. والهمــوم المُـراجع !
أسري مع السارين من غير سارين=واسحــب ملـفّات الحنـايـا و اراجـع !
وانذاب كنّي دمعة الشمع و آلين= يوم انّ خالي البال مبْـرِد وهـاجع !
لينَة كسير ٍ فـ العـمر مالـه مْعين =وان جـرّ ونّـاتـه قهـر قيـل : ساجع !
يا سجعة اللي قِصّ عنْه الجناحين=وين النهوض وكل الأنحا مفاجع ؟؟
يالليّ مسافر بسّ مدري على وين=باللـه هات لْنـا فـرَح و أنت راجــع !