صح السانك يا غازي
قصيده جيّده
ولو ان فيها الكثير من الملاحظات اللي بأتطرّق لها الحين :
انا غرامي بنت من يذبح الحيل=بنت اللذي للطيب يسكن دياره
بنت اللذي للطيب يسكن دياره
انا بصراحه ما لقيت تفسير منطقي لهالشطر ؟
وعمانها وقت الملاقا حلاحيل=لاشفتهم قلت إشبلاهم سكاره
الشطر الثاني تشبيهك ضعيف جدا !
ماهم سكاره شرب وإلا مهابيل=من فعلهم هابت اسود ونماره
نماره شنو ؟؟
اذا تقصد جمع ( نمر ) فهي النمور وليست النماره !
عدوهم لو راح وابعد تراحيل=لابد ماهم يفجعونه بغاره
البيت هذا جميل وبنظري انه افضل بيت في القصيده ككل !
وجه القمر.. لازار نورة مع الليل=نور الفجر.. لاوالله شمس بنهاره
الشطر الثاني فيه كسر واضح بالوزن !
إليا مشت تاقف جنود واساطيل=هي سيدة للبيض تاج الاماره
بما انك وصفت .. من زينها تاقف لها جنود وأساطيل كان ودّي ان بالشطر الثاني كملت الصوره التشبيهيّه يعني كان ودي انك ما قلت ( سيده للبيض ) دام البيت كله جنود واساطيل وتاج اماره !
كل الجمال يتوج براسها كليل=بدويتن لاقيل زاد افتخاره
الشطر الاول :
كليل تقصد فيها ( إكليل ) واذا قلت إكليل بيختلّ الوزن واذا خليتها مثل ما هي ( كليل ) بيصير معناها معتم وغير واضح !
الشطر الثاني : كيف تنطق بدويتن ؟؟ مراعاه للوزن تخليها سريعه وكأننا بلهجة الشام !
عريبة الجدين تبعد عن الميل=ولادوجت في سوق شرق وفناره
الشطر الأول تمام ولكنّك خربت جماليّة البيت بالشطر الثاني
عريبة الجدين تبعد عن الميل << تفخر فيها انها اصيله ومعرّبه الجدين
فجأه نلقى ( دوجت ) و ( سوق شرق وفناره ) نشاز واضح !والشطر الثاني عندك إقتباس واضح من قصيدة بن عماره عندما قال :
يفدى دكاكينك يا سوق الفحيحيل // سوق المرينا سوق شرق وفناره
ولاسمعوا الجيران صوت التعاليل=ولاقالت تؤبرني ابيلي استماره
الشطر الثاني فيه ثقل كايد !
بنت الاصايل للظروف المقابيل=تصبر على بلواك يوم إنفقاره
استفسار بسيط : معنى انفقاره ؟
وجدي عليها وجد من ينطر السيل= وده يشوف الارض زايد خضاره
الشطر الثاني خانك التوصيف حيث ادخلت المذكّر على المؤنّث
الارض يزيد خضارها وليس يزيد خضاره !
صح والا لا ؟
اخي غازي الرسمان
انا اعلم ان هذه القصيده قديمه نوعا ما ..
ولكن صدقني لا صار النقد المبني عليها ( بنّاء ) وربي انه يفيدك
ويخليك تتلافى اخطائك السابقه
وانت ما نزلتها هنا الا وتبي ردّة فعلنا وآرائنا
ان كانك بتتقبّل النقد بصدر رحب فهذا هو نقدي امامك
وان كانك ما تتقبّل النقد فـ السموحه منك والعذر !
وبالختام
صح لسانك وعساك على القوه
فمان الله