[القلب الحي]

بسم الله الرحمن الرحيم

تصدقون حاولت أمشي هالكلمتين بس ماقدرت

كأن القاف معسوف مع أنه ماهو على قافية بن فطيس يعني الكلام كثير

بس كلاً ومقدرته

الأخ العزيز تركي المري

أسعد الله جميع أوقاتك بكل خير ، وخلف المشعان مثل "الملطوم" في ليلة مافيها ضو قمر ولا عاد درى منين الضرب يجيه.

خسر حب واحترام الناس والسبب هو "الكبــــــــر"

ومن تكبر صغر في عيون الناس مهما كان.

والمشكلة أن قصيده لا يرقى للمستوى أبداً لكن الناس يحبون الصياح واللياح.

وأعطيك مثال بسيط

""نـــــــاصر الفـــــراعنة""


لا يحفظون الناس من حكيه إلا

"ناقتي يا ناقتي"

"منيــــــــــــــــرة"

"دن دن دن دن دن"

لكن خل واحد يعد بيت من الكلام اللي يقوله ناصر لأنه في اعتقادي أن ما يقوله ليس شعر أبداً، وإنما صفصفت كلام و"خذوهم بالصوت لا يغلبوكم".


وصدق احمر العين أبو حمد الله يبطي بأيامه يوم قال:

واليوم لا والله شفت القاف شاب =صار الشعر كوره وكل(ن) له فريق
وضاع الهدد بين الحديا والغراب=وضاع الصهيل مكرمين من النهيق
من جاب ضيعه قيل شوفو وايش جاب =أنشهد انه جاب له معنى عميــــق

كبير يبو حمد والله كبير ولا حد حولك من اللي ينابحون في المسرح والا "يهربدون"بكلام ماحد يعرفه.

يا تركي ياخوي

الشعر وشهو؟!

مهب كلام يطرب له سمعك وترتاح له نفسك ويؤيده عقلك وتأنس له عواطفك.

كلام مقفى وموزون يفهمه جميع الطبقات .


ابن فطيس الله يوفقه هو مثال الشاعر الفذ.

مثل المتنبي ....

لو تقرا للمتنبي على طول تفهم لأنه يخاطب كل الناس، وكذلك المبدع ابن فطيس.

ترى سهله جداً إن الواحد"يســـــرق" قصيدة من قصايد" الصنوبري" ويدخل عليها كم تغيير، ويصايح شوي مع جمهور مسرح"مايدري وين الله حاطه" واغلبيته من طلاب المدارس.


الناس صاروا ينبهرون بأي شي غريب حتى لو كان "كلام فاضي"

يعني لو قلت يا تركي بيتين، واقحمت كلمة عندروس بربروس شخمندروس ، صدقني في أمسية وحدة وأنت شاعر لا يشق لك غبار أو يمكن يسمونك"شاعر العرب أو شاعر الإنس والجن ".

إحنا في زمن العجايب حتى في الشعر.

والحمد لله إن ابو حمد الله يحفظه من كل شر موجود وعلمنا معنى الشعر الحقيقي والا كان الكثير مازالو يرددون "ناقتي يا ناقتي"

وعشان أقطع الطريق على كل من سيحد سنان قلمه ، فلو كان ابن فطيس من أي قبيلة أخرى كان قلنا صح لسانك وانت شاعر المليون في النسخة الأولى والثانية ويمكن الميه القادمة لأن اللي مثل أبو حمد الله يحفظه من كل شر ما يتكرر إلا كل 100 سنة.

لكن اللي اعمى الناس هي العصبية القبلية اللي تخلي الانسان يبدي القبيلة على كل شي حتى أحياناً على الدين، فما بالك بالشعر.

اشكر من نقل هذا الموضوع.