يقولون وش فيك امتغيّر وحالك حـال
وانا اقول مايبقى علـى حالـه الاّ الله
زمنّا ياكم غيّـر معالـم وهـد جبـال
وانا مثل من قد عاش والحالـه مقِلّـه
انا ماني بتاجر ولاني برجـل اعمـال
اعانـد زمانـي واتـحـدّاه واذلّــه
مع الناس والدنيا مسافه وانـا رحّـال
وشهريـن منعقـده ويوميـن منحلّـه
مقادير وضروف وهقاوي وقيل وقـال
ووضع ٍ يكـدّر صافـي البـال ويعلّـه
تعيـش الاوادم بالمنـاوي وبـالامـال
ولا احد ٍ بيدري ويش وقتـه مزينلّـه
ومن ربّته سود الليالي علـى الغربـال
وقامـت بنـار الهـم تصـلاه وتملّـه
غدت خوّته للحظ الاقشر ونَس وهبـال
مابين الفرج والضيق يغويـه ويدلّـه
ولا اشين من الدنيا لامالت على الرجّال
لاجل تجبره لقصيّـر الجـدر ولضلّـه
وهو طول عمره يرتكي للزمن لامـال
ويبرك لحمل الوقـت لاثقـل ويشلّـه
يسد اللـزوم وللنشامـا ذرى وظـلال
ويحفظ الجميل ويجمَل ويدمـح الزلّـه
هاذي والله اللي تتلف الرجل حال ومال
وتقلـب حياتـه غـم وتغيّـره كلّـه
للشاعر ابن شفلوت
منقول