[الهنووووف]

قصة وقصيدة

هاذي قصه عجوز بدويه مع رجال بدوي
من اغرب القصص واحلاها ....
يوم تزوج مرة ثانية كان عنده من قبلها زوجه وعيال . وبعد فتره من زواجه بدا يشك في زوجته لانها ما كانت تضحك في وجه ابد وشك لو انها كانت تعرف واحد(ن) قبله وتحبه وبدا يفكر في الموضوع وكان هالموضوع شاغله حيل .وبعد كذا راح لعجوز ... (( مو انا )) من جماعته وقال لها السالفة من اولها لا تاليها .وانه خايف انها ماتحبه ,وطلب منها طريقة تثبت له انها تحبه ..قالت العجوز لازم تصيد لك حية ,وتخيط حلقها وتحطها فوق صدرك لا نمت , ولا قومتك المرة ,سو نفسك ميت ... وسوا كل اللي قالت له العجوز , ويوم جات زوجته تقومه من النوم ما رد ولا تحرك ويوم رفعت البطانية عنه وشافت الحية هقت انها قرصته ومات, وقامت تصرخ وتبكي ..
وقامت تنادي ولد مرته الاولى اللي اسمه (زيد) ويقولون انها من الصدمة قالت ذا القصيدة
يازيد.. رد الزمل باهل عبــرتي
.....على ابوك عيني مايبطل هميلها
اعليت كم من سابق قد عثرتها
.....بعـود القـنا والخيل عجل جفيلهـا
واعليت كم من هجمه قد شعيتها
.......صباح.. والا شعتها من مقيلهـــا
واعليت كم من خفره في غيا الصبا
.....تمناك ياوافي الخصايل حليلهــا
سقاي ذود الجار لاغاب جارد
.....واخو جارته لاغاب عنها حليلها
لامرخى عينه يطالع لزولها
.....ولاسايل عنها ولا مستسيلهـا

ولما سمع زوجها ذا القصيدة , تاكد من مشاعر زوجته , وش كثر تحبه واللي كانت تخفيه من الحيا ماهوب اكثر قام من فراشة مستانس يبي يبشرها انه ما مات .. بس انها انخشت منه مستحية يوم درى وش كثر تحبه ودرت ان كل اللي سواه بس اختبار لها .. حلفت انها ماترجع له الا بشروط (لين يكلم الحجر الحجر,و يكلم العود العود)!!..وتقصد انها ماراح ترجع له مره ثانية .. (بغى يكحلها فعماها ) وراح للعجيز اللي جاها اول مرة يبيها تطلعه من المشكلة والعجوز طلعت ذكية و قالت له:
جيب (الرحى)والرحى معروفه تستعمل في طحن الحبوب, وهي يطلع منها صوت لا استخدموها ويردون عليها الحريم ويغنون ,(( هذا عن الحجر)) انحلت مشكلته ,اما العود فذكرت له الربابه وقالت له ان كان زوجته له رغبة فيك بتعود .... وصحيح عودت له والتم الشمل مرة ثانية