يالله يـا جـال الأمـور المهمـه
تجلى وهق قلب برى حال راعيه
البر دجته و البحر رحـت يمّـه
أدرج سبب حظ على الله مساعيه
يوم إن ولد اللاش رزقه على أمه
رزقي على اللي ميّت القشع يحييه
ماني وانـا بنـدر ببيـاع دمـه
يقطعك يا بيّـاع دمّـه و مهفيـه
اللـي يبيّـع لابسـات الأزمــه
ثور يبي بيض العماهيـج تغنيـه
يزعل ليا جت ليلة الـدول يمّـه
يرضى بسوق المال بأخيه و أبيه
خطو البخيل اللـي يكبّـر معمـه
يقرا الكتاب و واجب الله مخليـه
أما هرج له فـي رفيقـه بنمّـه
والا عطا و أمه تضيّـع هقاويـه
يا مل قلب كـل مـا مـات همّـه
دارت دواليب الدهر ليـن تحييـه
فرّاق شمل النـاس عيّـا يلمـه
وقتن يشيب الراس من شاية فيه
أحدن ينام و حـط راسـه بكمـه
و أحد تخم النوم عينه و تخطيـه
و أحدن يحاول بالردى بنت عمه
و أحدن يحاول ستر عذرا عوانيه
تخالف الأنظـار شرقـن و يمّـه
كلٍ هدف رايه من الناس مرضيه
أنشدك ياللـي كـل شـي تتمـه
تقرا الكتاب كل فـرض تصليّـه
ويش القليب اللي عميـق مجمّـه
ما سرّ غرسه ماه عطشى سوانيه
سم السبب يا عارفن عنه سمـه
سم السبب يا عارفه قبل اسميـه
الشاعر بندر بن سرور العتيبي يرحمه الله
منقول