[رجـم بـذال]

السلام عليكم ورحمة الله وبركاته

قصيده جميله


وارجو تنال اعجابكم

الا ياغزالن فوق خده رموشن سود=مضاليل رمشه ضافياتن على خده
على خدن ابيض مع بياضه حمار اورود=لاشافها راعي الهوى يلعن جده
اليا شاف رمش العين والاشقر المرجود=تقول الدروب الواسعه عنه منسده
اليا راح عود كن عنه الفضاء مسدود=جداه الونين وصفق يده على يده
يضّيع كلام العقل ويضّيع المنقود=للهرج ماعنده لا هاته ولا وده
يعد النجوم الساهره والعباد رقود=ويرفعله الهاجوس ضغطه اليا حده
ولا ياحمام الورق زيدي وانا بازود=اليا جبتي اول صوت مني خذي رده
تنوحين طربانه اليا هز ريشك نود=وانا هزني حبن صميم الحشا قده
ولا ياحمامه حددي للونين حدود=واالله ان طولتيه لطول انا مده
اجاوبك وجاوب خلوجن تبي المفرود=سروبه على الي فوق ماطولو شده
سروبه غروب الشمس ومعارضين انفود=يحده عكاش الحزم للعرق ويحده
على الجيب الاشهب سايقه شايبن عسرود=معودته ايام الشدايد على الشده
يحوفه يبي يمكن السوق عودك عود=يبيله مقاضي والمواتر تبي عده
يبي البن والهيل الخضر والتمر والعود=مواريث ابوه الي ورثها على جده
يبي الجاوي الاصلي ويبي من الكنبود=ويبي الي اليا حطه على الجمر له نده
سرى بالحوار وكبه الشايب المقرود=جبرته ظروف الوقت ولا ماهو وده
ولدها خيار وهي بعد من خيار الذود=تجرلها الحنين ودربها تلتفت قده
تبارى عبايرها على الخد يامعبود=وتشم الحبال الي على البدي ممتده
ولقت شي من ريحه على ربوه المعقود=وقامت حجر الجيب من قدم وترده
وجاضة وجضة جضة الجايع المطرود=تحسب الشجر بحساب الادباش وتعده
وانا مثلها وجدي على صاحبي وجود=وجود الغني الي ضواه الفقر ضده
بعد كان يملك عماير جدد ونقود=سحقه الله الي يبني العز ويهده
رماها بالاسهم يحسب ان السهوم تزود=وسرى والمؤشر للحمر يتجه قده
ودخل للمدير وقال تكفى يابو ماجود=ابي راس مالي لو نقص من عده
قال انتها لو جيت اعيده ماعاد يعود=حساب اخذته البورصه كيف ابارده

وسلامتكم


لشاعر

شقير العتيبي