لحظة بوادعك قبل انك توادعني
ماني من اللي تروح ويمشي خلافك
لي عزتـ(ن) ياوليد الناس تمنعني
لو قلت ما بيك تمزح خاطري عافك
قد قلتها لك قبل ما كنت تسمعني
واليوم فعلك هو اللي حطم اهدافك
يابن الاوادم نصيحه واخذها طعني
ماكل شخص يذل النفس لا شافك
صحيح زينك في بعض احيان شجعني
لكن زود الكرم زودت باسرافك
ماهوب انا اللي تنزلني وترفعني
لو درت في نيتك كسرت مجدافك
تبي الصراحه تصدد لاتطالعني
اخاف من دمعتك والا انت ماخافك
ماغير واحد ولا مخلوق ولعني
الحب يجرف ولا تختار جرافك
لو قلت لاحدن تحب وقالك يعني
خله وبعد مادام الوقت ماطافك
اصارع النفس والدنيا تصارعني
والفرق واضح بمغرافي ومغرافك
ياخي ترى القلب عيا لا يطاوعني
يابن الاوادم توكل خاطري عافك