بسم الله الرحمن الرحيم
السلام عليكم ورحمة الله وبركاتة
بكيتك من الفرقا وانا دمع عينـي حـار=سلامٍ على الشرهة ولاآخر على المنقـود
يقولون من طينة محنّـة وقلـب كبـار=لاوالله من طينة عذاب وجفـا وصـدود
يادوب اتحمل جمرةٍ مـن جحيـم النـار=تلحّق عليه باختها اللي بـراس العـود
خذيت الهوى طيش وعبث حُب واستهتار=على قولة البدوان عيب وعليـه شهـود
تبريت مني والوفـا فيـك طيـر وطـار=عساك آخر العنقود منـت اول العنقـود
مخليني اعجوبة زمن في طريـق المـارّ=مضحّك بي العاقل مشمّت بـي المقـرود
لاني داخل الصورة ولابخـارج الاطـار=حبيبك وانا غايب عدوك وانا موجود...!
ومعك مابعد عدّيت عمري من الاعمـار=مخليه ريشه بين اصابع هبـوب النـود
تذكّر ولك بالذكر مالـك مـن الاسفـار=تذكـر وخـلّ الذاكـرة بالزمـان تعـود
تذكّر يومنّ احدود وصلك ثـلاث امتـار=تخطيتها ماكـن ذيـك الحـدود حـدود
وصلتك وقمت بواجبك قبل سابـع جـار=اخفي عليك سدود وابني عليـك سـدود
سدودن تبي تبنى والاخرى تبـي تنهـار=من ابدع تصاوير الله الخالـق المعبـود
احس اني ابحر فالسفينـة مـع البحـار=وانا اقول يالبّا هذيـك الوسـاع السـود
اغازل حَوَرْها وابـدع لرمشهـا تذكـار=واثمن هداياها وهـي مـا وراهـا فـود
تذكّر وانـا ويـاك فـي لمـة السمـار=تقول البرا مردود اقـول البـرا مـردود
تحديت فيك الشاعر اللي مـن الشعـار=بعد ماتقول اسمه تذكـر علامـة قـود
توارت نجومه يوم لـدّت لـي الانظـار=طلع في عيون الناس ماهوب ذاك الزود
تذكر يومنك جيتني يـا غريـب الـدار=ابشّـر بشوفـك كنـي ابشّـر بمولـود
فتحت الك صـدري ياحبيبـي زرار زرار=هذا بيتك وبيت امك وبيت ابـوك العـود
وتحتلنـي وتحطنـي دولـة استعمـاار=وانا فالسعودية تحت راية ابن سعـوود
مدغم أبو شيبة