( الغرض من إرسال القصيدة واضح )
حان الـوداع ولا بقـى للعتـب دور
الله لنـا وفجـوج ربـك وسـاعـي
دام الصداقة ما هي إحساس وشعور
مال الصداقـة بعـد هاليـوم داعـي
قلبي على المقفين ما هـو بمجبـور
من بـاع للعشـرة مصيـره يباعـي
رح واعتبر نفسك مسامح ومعـذور
قلبي على كثر الخطا مـا استطاعـي
انا على فرقـاك بالعكـس مسـرور
مثلك خسـارة فيـه دمـع الوداعـي
وش عاد لو خاطرك ضايق ومكسور
مـدام خيبـت الرجـاء والمساعـي
ما كنت اصدق فيك يا ضايع الشـور
دايـم وانـا دونـك مكثـف دفاعـي
وكانك على ما قايل منهي ومأمـور
بدري على شـرواك لويـت ذراعـي
فنجالك اللي سقت من يـدك منثـور
لا صار ما انتـه للصداقـة مراعـي
مَن يخدم الأنذال ما هـو بمشكـور
ومن يزرع الصبخا جـداه الضياعـي
تـوي لقيـت لعلـة النـذل دكتـور
البعد عـن شوفـه يزيـل الصداعـي
ما فيه داعي ينفضح كـل مستـور
عيني تشوف الدرب والقلـب واعـي
نور الحقيقة بـان والعلـم مخبـور
شفت السباع وشفـت روس الأفاعـي
افلح.. قبل يضربك رمحي على الزور
وتلقى شبيهـك يـا خبيـث الطباعـي
عين بكت فرقاك تحرم مـن النـور
لا تنتظـر بعـد الـوداع اجتمـاعـي
$ قصيدة للشاعر رشيد الفريدي