السلام عليكم ورحمة الله وبركاته ...
تحياتي لهذا الصرح الشامخ وجميع رواده وأعضاءه الكرام ... يشرفني أن أطرح بين أيديكم أول مشاركاتي بينكم ... وأسأل من الله القبول ... وان شاء الله إني أخالف المثل .. وتكون بدايتها مسك ......
يلوح القاف في مزن الخيال ويمطر التصوير= وتزهر به جراهيد الورق لا سالت أقلامي
وأصوغ أبيات شعري يا زمان الحكي والتنظير= بعد ما صار جورك يا زماني مصدر الهامي
زماني , والسوالف بعضها يستوجب التشفير= بأسولف لك على وضح النقى دام الهدف سامي
أنا عبد ٍ فقير لعفو ربي ذنبي التقصير= إلهي ما لجيت الا لوجهه من جفا أيامي
عجزت ولا لقيت لقسوة أيامي معي تفسير= رياح الحظ تعصف والضحية مركب أحلامي
وردت بذود هقواتي ودورات الليالي بير =ولكن للأسف صدرت مالمورد وأنا ظامي
طموحاتي مثل تغلب وجور الوقت سيف الزير= لو ان له ثار يمديه أقتنع من كثرة آلامي
ياكم مرة تحديت الظروف وخانني التقدير= وكم مرة حكمت وحكم وقتي ينقض أحكامي
وكم شبيت شمعة من تفاؤل في رجى التغيير = حسافه وش تفيد الشمعة ان صار البصر عامي
نتيجة ما سبق قررت أخطي حاجز التبرير= وأوقف للتحدي يازماني وأكرب حزامي
مادام العمر مرة وش يفيد الصمت والتفكير= أبأعلنها بوجه الوقت ثوره وأركز أعلامي
ومادامي متكل باللي بيده الحكم والتدبير=فبأرسي في وسط بحر الظروف وموجها الطامي
سئمت الواقع السلبي وعذر الخير في التأخير =رضوخي يازمن غلطه عسى الله يغفر آثامي
أباصنع واقعي بإيدي وأصير إنسان لي تأثير=وبأرغم وقتي اللي طول عمره يعشق إرغامي
زماني , جيت ذالمرة وأنا قانص وعزمي طير=ليا لاحت له الفرصة يعود مخلبه دامي
نويت وعل في شي ٍ نويته يا زماني خير= وعسى ربي يقدي للمعالي خطوة أقدامي
زماني , في ختام السالفه لك فايق التقدير=يقدمه الفقير لعفو ربه (جابر اليامي)
وسلامتكم .
جابر بن صغير بن قادرة