[طبــ ع ــي كــذآ.. }~]

ياراسي عسى الله لايحدك على اي انسان
....................وياعزمي تقوا وانطح الشده بشده

وياقلبي تصبر عادة الصبر والسلوان
....................تواسي قوي الباس لو الزمن ضده

وياعيني لاترجين المقفي نظر واحسان
....................مدامه مقفي بين وده ولا وده

ترا الضيق ضيق القبر ماهوب في الآوطان
....................مدام العزوم عزوم والآرض ممتده

والى قفت الآضعان عن باقي الآضعان
....................يجي يوم للضامي يعود على عده

وش امحق من الخلان لا قفوا الخلان
....................وتواصوا على الهجران والبعد والصده

وش امحق من الخبلان غير اخبل الخبلان
....................الى من بدوها مزح واليا انتهت هده

حسيبي على اللي صد عني وانا شفقان
....................بداها تغلي واعلن الهجر من جده

يبيها على الذرعان واخطت من الذرعان
....................وتنصت معاليق الحشى يالعنبوا جده

الا ياوجودي وجد من حده الديان
....................ولا في يدينه شي والدين له مده

مابين الفقر والدين والسجن والسجان
....................وناس ليا منهم دروا قالوا مسده

على اللي غلاه يسابق الدم بالشريان
....................احس ان غلاه يسابق الدم ويحده

بنينا الغلا بالشوق والود والتحنان
....................الين الغلا بصدورنا وصل لحده

وتعاهدت انا وياه مانطري النسيان
....................وخذانا العناد وكل مابيننا هده

واذا كان كل اللي بنينا بلا عنوان
....................فلا خير في ودي ولا خير في وده

وانا ماني من اللي لا حلم قالوا العربان
....................لاتحلم بشي ما انت حوله ولا قده

آباقف وادين الوقت واحاربه لاشان
....................ولابده يزين الوقت لابده

وآبصبر على الهجران لو طول الهجران
....................واذا لي نصيب يرده الوقت بيرده

يقولون جده غير عن باقي البلدان
....................وانا اقول هذا في عيوني مثل جده