( بكره بتوب )
( أوقنـي شـح نفسـي ) يـا إلـه الأنـام
نعنبو قلبـي اللـي مايهـاب الذنـوب ...!
لو قدرت أمسكه بيـدي ؟ علـي بالحـرام
لطعنه من قهر تسيعين طعنه وأتـوب ....!
كـل ماجـدّ ليـل التوبـه أغفـى وأنــام
وإن صحيت ؟ أتناسا إني بتوب وبنوب ....!
وكل يـوم أحتـري ليلـي يجـي بالظـلام
وأتعشّم بتوبـه وأدري إنـي كـذوب ....!
آآآآآآآه ياضعف جهدي بالدعـا والصيـام
وآآآآآآآه ياقو جهدي في لحاق اللعوب ....!
لـو تأثـر فـؤادي مـن حديـث الأمـام ؟
كان ماصرت أنا بصوب وحديثه بصوب ....!
عقب قل الحـلال وعقـب كثـر الحـرام ؟
توّي الحين أفهم ليه وجهـي شحـوب ....!
الطريـق المـودي للنـجـا والـسـلام ؟
درب واحـد وللشيطـان عـدة دروب ....!
ويـن بكـره يابكـره ؟؟ لايزيـد الـمـلام
كل ماجات عبره قلت : ( بكره بتوب ) .... !
لِـ آلشاعِر (غازي بن مشعل)