[شيوم العجمي]

اعذريني لبّا قلبــك كل مابان الصباح
... واعذريني لبّا عمرك ياعســـى عمرك طويل

وعذريني لو نثرت العشق في وجه الرياح
... وعذريني في هجيري واعذريني فالمقيل

وعذريني لو زعل صيّاح واللي راح راح
.... وعذريني لو قصــرت الرَجــل بالدرب الطويل

وعذريني كل مانادوا على حي الفلاح
... وعذريني كل صبح وكل عصر وكــل ليــل

لنّك اجمل من خلق ربّي ولبسته وشاح
... ولنّك اجمل من سكن قلبي ولا غيرك بديل

ايه والفرقا تراها من سببها كم طاح
... قرم مثلي مايخــاف الموت والســيف الصقــيل

وايه لا منّي ذكرتك كل عرق(ن) فيني صاح
... يشكي غيابك على الثاني وانا ماني بخيل

ياوّل احلام الطفوله واخر ايّام الكفاح
... الرجــا باللّـــه بعد فرقـــاك يالطّرف الكحيـــل