أيام عدت في غيابك ولا جيت
وأنا براسي شي لازم أقوله
حملتني مالا اطيقه وصديت
وتبيني انسى كل شي بسهولة!!
قلت انك تسوي وتفعل وسويت
اخذتني من الكون عرضه وطوله
وقلت اتحداني وفعلا تحديت
متعلم التكتيك على اصوله
على بطولة قلبي الي تمنيت
طبقت تكتيك واخذت البطوله
اوضح اكثر طيب ركز بهالبيت
واستوعبه يوم العرب صفقوله
في دولة احساسي ومن غير تصويت
في ظرف ساعة صرت رئيس دولة
عطيتك اطيب قلب لكن ترديت
وجرحتني يابو مشاعر خجوله
سويت لك عالم مثل ما انت حبيت
احساس طاغي في براءة طفوله
يمكن لو انه مرك الشوق حسيت
انك حديث العام واربع فصوله
مشكلتك انك في جفاك استمريت
مفكر ان كل شي تقدر تطوله
ومشكلتي اني كنت رايح ورديت
رغم اني عايش حلم ماني بحوله
سلامتك ماعاد ابي شي مليت
حتى الشعر ما عاد لي نفس اقوله