ودي اسج القدم في فضا البر الفســــيح
تطلق عيوني نظرها مع الارض الفيــــــاح
جلستي بحدا المسايل وبالي مستــــريح
مغبط اصحاب الملايين فيها يافـــــــــــــلاح
في فياض ام سالم بها تصدح صـــــــــديح
تلعب المنكوس فيها طرب برقا الجنــــــاح
للخزامى والنفل مع هبوب النــــــــود ريح
منعشاً لاهبت اعصير ولا فالصبـــــــــــــاح
ودلة ٍ فنجالها يبري اجروح الجـــــــــــــريح
مثل ما قد قيل برية ٍ والماء قــــــــــــــراح
مع نشاما كل منهم سنافياً صــــــــــــــريح
ناشياً في طاعة الله وذا سر النجـــــــاح
لاتخاوي فالخلا كل مثبوراً شحــــــــــــــيح
مايميز بين جد السوالف والمــــــــــــــزاح
خايب الذمه قبيح ومنطوقه قبــــــــــــــيح
مايفرق بين فعل الحـرام من المبــــــــاح
ولا تخاوي فالخلا كود كساب المــــــــديح
نشمياً لاضاق خاطر خويه ما استــــــراح
همت في عشق الطبيعه ومنظرها المليح
شاعراً واحب نظم الطواريق المــــــــلاح
وافتخر باني سعودي ومنهاجي صحـــيح
وانتمائي لدين الاسلام لبسني وشـــاح