الله من هم ٍ بروحي سهجها = بخافي ضميري في كنين الحشا لاج
أحر من نار ٍ توقد وهجها = منها خطر روحي على سلك ديباج
وعين ٍ عسا المولى يعجل فرجها= يفوح ناظرها كما عين هدّاج
استر سلت للدمع من مارهجها = غيض ٍ يكض اعبارها مثل الامواج
كم واحد ٍ له غاية ٍ ماهرجها = يكنها لو هو للادنين محتاج
يخاف من عوجا طوال ٍ عوجها = هرجت قفا يركض بها كل هرّاج
يقضب عليك المخطيه من حججها = حلو ٍ نباه وقلبه اسود من الصاج
الله خلق دنيا وساع ٍ افججها = وعن مايريب القلب لك كم منهاج
الرجل وان شطت لياليك سجها = عسى تواليها تبشر بالافراج
لشاعرها الكبير محمد بن احمد السديري رحمة الله عليه