|
قطرة ندا خلّوا بها سيل جرّاف
عزالله ان الصدق ماتوا أهاليه = والحق ضايع ماوجدناله انصاف
جيل الذمم والصدق ولّت لياليه = وبيّن لنا جيل ٍ غريب ٍ بالاوصاف
جيل ٍ خبيث ٍ لدرك الشخص خافيه = قلّوا به الاجواد واللي عرف شاف
المصلحه والكذب والبايعه فيه = حتى المصالح تبتدي فوق الاشراف
واللي يجامل 0 لو سنا الحق يخفيه = لين ارتفع شي ٍ به الرفع عيـّاف
حطـّوا به المعنا على غير داعيه = قطرة ندى خلّوا بها سيل جرّاف
قول ٍ بلا الافعال ويش الرجا فيه = ومعنا بلا داعي على ويش يرّاف
النفخ والتطبيل ياناس تشويه = وغيّر لنا الحاضر عن اطباع الاسلاف
النفخ حط الشين والزين مهفيه = خلّى دنيّ القاع من فوق مشراف
مدري مرض ذالوقت بحتال اداويه؟ = ولاّ محال ادواه0 واعطيه انا طاف !
عجزت عن حقن البلا من تفشـّيه = وحاولت اعرّف واعتذر كل عرّاف
خلاص مالصدق بأحساس نوفيه = مادام هذا وقت كاذب وزيـّاف
وسلامتكم
الشاعر / سعود رتيبان الجويّر
__________________
التعديل الأخير تم بواسطة الجويّر ; 25-11-2005 الساعة 01:55 AM
|