[الجويّر]

ياعليم الهوا ماذكرلك دوا في عليل النوا والجروح اكثرن = التجافي مرض لافجع واعترض وان امرنا فرض يالله انك تعين

شين درب المحبّه ليا ضاع طبّه بمنّ تنعجبّه يزيدك غبن = لو تزوده حلاوه وعطف وطراوه يشنّ العداوه ولو كنت زين

لو تزيّن طبوعك مصيره يلوعك ويطفي شموعك ليا نورنّ = مثل خل ٍ هويته وصنت وعطيته وكلّش وفيته بشوق وحنين

لاكن انه نكرني وراح وهجرني وسيفه غدرني بظهري طعن = طعنته بالغدر يامحمد قهر وانكسار العمر في ضياع السنين

عزّتي للمفارق لمومه تفارق وبين المفارق كسير الحزن = يشتكي من عذابه ولاحد ٍ درابه ومردوع بابه من العاذلين

الاسف والخساره بوجهه عباره صبورانتظاره لصبره زبن = والحمام وغريده يبيّح سديده ونظم القصيده بدا بالونين

ويذبحك بالتوجّد بنار ٍ توقــّد ونظره تعقـّد من اللي شحن = شاحن الهم كله ثقيل ويشله راجي ٍ منوة ٍ له لقلبه ظنين

ويختم ابن الجويّر كلام ٍ ينيّر وبالظن غيّر مسار الفتن = قاصده بالصهيبي خوي ٍ قريبي كريم ٍ عريبي محمد حسين

له موجـّه كلامي بعدل وتمامي ويقزي المنامي عيون ٍ صحنّ = وماخفا بالظعينه لاجل عاذلينه عقول ٍ فطينه وانا له فطين



وسلامتكم





الشاعر / سعود رتيبان الجويّر