[الذهب]

هذي قصيده لشاعرنا الكبير العم والشيخ محمد بن فهد بن منيخر حفيد الجلوبه وهو شاعر مخضرم ولكن صعب الحصول على قصيده وقد حصلت بالمصادفه على بعض من قصائده من احد الربع جزاه الله خير ووعدني بالمزيد.........وقبل ان اورد القصيده احب انوه ان شاعرنا اكثر قصيده عن ربعه والتوجد عليهم وهو شاعر بمعنى الكلمه وان كان اغلب قصيده محصور في ربعه ووالدي اطال الله في عمره لا يحب قصيد محمد بن فهد ولا ان يسمعه لا لشي وانما لانه شاعر..........مؤلم...........
وخصوصا ًللشيبان.
واليكم القصيده وموضوعها انه يقع في جنوب هجرة حنيذ بمحاذاة الازفلت من جهة الغرب رجم او حزم يسمى الارخم وهو يقع شمال من بيت ومزرعة العم ابو فهد وقد ذهب ابو فهد يوسع خاطره حول الارخم فهاضت قريحته بهذه العصماء:

يارجم الارخم ويش عندك من علوم = عطني علومك من قديمٍ وتـالي

أنا على علومـــك حـــــزينٍ وملزوم = أخبــارك اللي ماضيه عدهــالي

صوبك حداني حاشر الصدر وهموم = أهات في صدري تجول أجتوالي

يا رجــم أنا مثلك وحــيدٍ ومهضـــوم = عزي ألحالك وأنت عزك ألحالي

ربعي وربعك راحوا أموات و قسوم = راحوا وأنا قعدت عندك ألحــالـي

يا لــيتني ما دجـت في قاعك الـــيـوم = لو أنني ما جيت صوبك أشـوالي

ذكرتني وقتٍ مــــضى كـــنه أحـــلوم = يوم السعد والعز مقــبل أقبالــــي

يـا رجــم ما عـينت لـي كـل شغمـوم = فحـول الرجال اللي تشـيل الـثقالي

كم شاف رجمك من مناعير وقروم = ويا ما نزل حولك من الناس غالي

*أسياد سنو للعرب شرع وسلوم= اللـي لـهم قــــدرٍ رفيــع و جـلالـي

اللــــي ذبايحهم من العقـر الكــــوم = أكبـــار الــصحون متعبين الـدلالـي

الى ذكرت فــلان وفــلان مـــرحوم = قربت محاضيبي وضـــاق المجالـي

من دونهم ما كن مضى لي ولا يوم = الله أكبر ما أســرع الــوقت زالــي

وجــدي علـيهم والتـوجـاد مذمـــوم = عليهــم أصفـق باليمين الشـمـالـي

صادتهم صدوف المقاديــر بسهـوم = وطـوتهـم الايــــــام طي الحبالــــــي

هذي منازلهم بنـا فوقها الســـــوم =ارضٍ خلا من باني البيت خالي

وهذي مبانيهـم هدامـات و ثـلــوم = علــــى بقاياهـــا القبيســـه تلالـــــي

وقفت فيها شـارد الذهن منجـــوم = بيــــن الحـقـيـقه والحــلام و خيالــي

وفيضت من جاش الحشا كل مكتوم=شفت الديار و خــــبث البيــن فالــــي

ويا ما طوت الايام قــومٍ بأثــر قــوم = هـــذا يحــل وذاك شـد الرحالـــــــــي

أسقتني الايام مرٍ على الصــــــــوم = منها شربت السم وأنسم حالــــــــي

ولا خير في دنيا الردى كلها لــــــوم = ولومٍ على من حطها راس مالـــــي

زوالها لا شك واقع ومحتــــــــــــوم = تزول مثل الظـــــل لامنه زالـــــــــي

والدايم الله والبشر ما لــــهـــا دوم = ودوام حال الحال شيٍ محالـــــــــــي

وأمنت به ربٍ له أنصـوم و أنقـــوم = اللي خلق كونه بكل أكتمالـــــــــــــي

وختامها صلوا على خير مختـــــوم = اللي نشر دين الهدى والعدالــــــــــي

صلى الله على نبينا محمد وصح السان العم ابو فهد وجعل عمره طويل وأتمنى أن تحوز مشاركتي على رضاكم.