السلام عليكم ورحمة الله وبركاتة
كنت ابحث في ادراجي ووجدت هذي القصيدة بين اوراقي المبعثره وهي قصيدة مضى على نشرها سنتين تقريبا ً وكنت احتفظ بها من جزالتها واترككم مع الشاعر / محمد بن مسعود المطيري
ياخافقي ما كل من ينبت على جبينة عرق=يسكن متاهات التعب قلبه وحمله يرهقه
من يكتب مثل هذا البيت يصعب علينا تقديم قصيدته ، وفي نفس الوقت يصعب علينا ان نضعها بدون مقدمه ، محمد المطيري يضعنا في حيره والحل الوحيد هو ان نترك الإبداع هو نصيبه في هذه الصفحة ويبقى نصيبنا هو ان نتنفس نقاء الشعر الحقيقي ...
البارحة والعين يغشاها من غيابه أرق=والليل كنه ما ورى فرقاه شمس ٍ مشرقه
البارحه حزني بنى فيني تناهيد وقلق=واوهام ترسم في مداهيلي ظنون ٍ مورقه
أحيان احس إن الحكي يحرق مسافات الورق=وأحيان احس إن السكوت اللي في حبري يحرقه
وأحيان أحس إن الغلا صمت من عروقي نطق=حاول يعيش بداخلي دايم وربي وفقه
عاشق واعرف إن الهوى بحر وفي قلبي غرق=والشوق وجمر ٍ يوقد شجوني واضمه وأعشقه
أبـ أصدقه حتى ولو ماعمره بحقي صدق=وقتي واعرف إنه ولو يكذب بذمه واصدقه
لايخدعك يا خافق المجروح مظهر لا برق=يغرس بصدر المهتوي الهيمان لعنة بيرقه
والفاتن اللي بعثر أنفاسك ولو شفته عشق=مايكفي إلا تلمس دموعه وهمه وقلقه
ياخافقي ما كل من ينبت على جبينة عرق=يسكن متاهات التعب قلبه وحمله يرهقه
هذا الزمن حكمه على الوافي ليا منه وثق=والخاين اللي للأسف يقبض كفوف المشنقه
هذا الزمن يا ما بوجه الأجودي باب إنغلق=والباب يفتح للردي غصب لو ما يطرقه
ما من فرج والمشكله نبضك من احلامه شرق=وهذا الزمن وأدرك تفاصيله واقدر منطقه
خلك على وضعك وأنا ببقى على مفرق طرق=تعبت أكمل رحلتي والطيب عييت أزهقه
هذا الخيار اللي بقي واللي بقي عمر أنسرق=إلى متى وأمد عنق الشوق للي يخنقه
وإلى متى والدمع يسكبني على صدر الشفق=والبعد يحلف للوصل ما أحد لدربي يسبقه
إلى متى والسالفه طالت وقلبي لاخفق=حسيت كنه يسأل ضلوعي من اللي وهقه
وأنا الغريب اللي رماه الحظ في غبة نفق=يجهل مخارج مدخل ادغاله وياسه وثقه
أو كني التايه وسط صحرا ومن نوحه زهق=يبغي جهات لخطوته والغرب ساوى مشرقه
الغايه إني لا جمعت الفرح سافر وافتراق=ذا شاربي يا فرحي المفقود وإن جيت إحلقه
والمعذره يا حلمي المسكين والناعق نعق=لا تبحث اللي في خفا روحي وموتك تطلقه
والا الهوى من يوم ماعشته تناهيد وقلق=والليل كنه ماورى فرقاه شمس ٍ مشرقه
للشاعر /محمد بن مسعود المطيري