السلامُ عليكم ..
ومسّاكم الله بالخير ..
إبويتات لها مناسبتها أتمنى لها القبول ,,
,
,
يالله ياللّي في يديك التساميح=ياساميٍ يسما على كل سامي
أعزّ وأكبر من جميع التماديح=وإسمك منزّه عن جميع الأسامي
ياللّي بوجهك تدعي الخلق وإتصيح=ماعاد به ورا مقامك مقامي
يطلبْك عبدك بين حمدٍ وتسبيح=بالعشر الآواخر بشهر الصيامي
شاعر وقلبه كلّ ماهبّت الريح=إمعلقٍ بين السما والغمامي
إمجرّبٍ دنيا الهوا والمجاريح=غوا وهام إمع الغيا و الهيامي
ماكان له معهم توجّد وتبْريح=واليوم ِولّع وإبتلابه وهامي
إيقابل إوجيه الوجيه المفاليح=وإيصدّ من وجه الرّدي والخمامي
صفّح من إربوع السّواليف تصفيح=اللي ماغير إفعولهم بالكلامي
يلغف إحيوده فالحلوق النوابيح=إلين عرّضها الخلا والمضامي
يمناه .؟ تندى من شحوم المفاطيح=ماهي إمضراتٍ لفعل الحرامي
دمعه .؟ إلى منّه سمعْ ذكرك إيسيح=ويسجد لوجهك طاعةٍ وإنسجامي
يدعيك وإيصلّي صلاة التراويح=وإيقوم وإيصلّي صلاة القيامي
عشان لاسجّلتها بالملاويح=تغفر وترفع كل ذنبٍ وأثامي
وكثر الذّنوب اللي على عبدك إتطيح=تمحا خطاياي وتقبّل صيامي
وإنّك تقدّيني بنور المصابيح=وإنّك تجنّبني دروب الظلامي
يالله بيديك القفل والمفاتيح=أغيث عبدٍ من حسـانـيك ضامي
إذنوبه إترجّح على كل ترجيح=لامن تذكّر ماضيات العوامي
حنا على غيثك وعفوكْ مشافيح=نطلب بوجهك ياكريم الكرامي
,
,
فهيد بن محمّد بن عصيدان