ألا يالهبوب الباردة عجَلي هبي=على جاش من قامت هواجيسه أتلوبه
أنا مرةٍ أصحى ومره يغيبي=وأسَرح معا كثر الطواري بغيبوبه
ألا يادهر ماهو بحقٍ تلاعبي=وخليتني لمقَرد الخلق لعبوبه
أعبادٍ مغفلها الزمان وتعجبي=يحسبون قل المال فالرجل عذروبه
وأنا قانعٍ باللي علي كاتبه ربي=ومومن بمقدوره وقانع بمكتوبه
ولا أبغى عما الاريا برايه يجربي=وهو ماعرف ماجوب ربي وماجوبه
هذور المجالس راعي المدح والسَبي=وهو بالخلا لو جاه بنتٍ خذت ثوبه
يقولون لي جز من تصرفك وتحَبي=وهي توبتي من مجتمعهم هي التوبه
ديار الوباء من طبها راح متوبَي=وقرَابة الجرباء على الحول مجروبه
أنا عارفٍ منصاي إلا من بدانبَي=وعارف طريقي والذي باتجه صوبه
وأنا أعرف من أعادي وأنا أعرف من أحبَي=وبه ناس لاتعرف ولاهي بمحبوبه
الشــــــــاعر / سعد بن جدلان الأكلبــــي
أتمني أن أكون وفقت في الأختيار وحازت على رضاكـــــم
أخوكـــــــــــــــــم
راعي الدهمـــــا