دنـيـت لي من غـالــي البن مـالاق=بالكـف ناقـيها عن العـذف منســوق
احـمـس ثـلاثً يانديـمـي على ســاق=ريحه على جـمر الغضى يفضح السـوق
وايـاك والنـيه وبالـك والاحــراق=واصـحـى تصير بحمسة البن مطـفـوق
الا اصفرّ لونها ثم بشّـت بالاعــراق=صفراً كما الياقوت يضرب لها اللوق
واعـطـت بريـحً فاخـر فاضـح فــاق=ريحه كما العنبر بالانفاس منشــوق
دقـه بنجـرٍ يسـمعـه كل مشـــتـاق=راعـي الهوى يطرب الا دق بخـفــوق
لقّـم بدلـة مولّــعه كـنها ســــاق=مصـبوبةٍ مربـوبـةٍ تـقـل غـرنــوق
خـله يفوح وراعي الكـيف يشـــتاق=الا طـفـح له جـوهـرٍ صـح لــه ذوق
أصـفا قـمورهٍ كالزمرد بالاشــعـاق=وكبارها الطافـح كما صافي المـوق
زلّها على وضـحاً بها خـمسة ارنـاق=هـيلٍ ومـسـمارٍ بالاسـباب مسـحــوق
مع زعـفرانٍ والشـمطـري الا انسـاق=والعنبر الغالي على الطاق مطـبوق
فيلا اجـتمـع هـذا وهـذا بتيفــاق=صـبه كـفيت العـوق عن كل مخـلوق
بفنجـال صـينٍ زاهـيٍ عـند الارمـاق=يغـضـي بكرسـيه كما غـضـاي غرنوق
الا انطـلق من ثعـبته تقـل شـبراق=رنـقٍ تصـوّر للحـمامـه على الطـوق
شكّـل على الفنجـال لونــه الا راق=دم الغـزال الا انمـزع منه معـلوق
خـمـرٍ الا مـنـه تسـلـل بالاريــاق=وعـليه من ماء صافي الورد مدلـوق
راعـيه كـنّه شـاربٍ ريـق تـريــاق=كاس الطـرب وشـرور من ذاق له ذوق
عنايد
تسلم ايدش على القهوة الطيبة