جساس والزير
يا كذبها قولت ترى الناس للناس = والسـالفه ماعـاد تحـتاج تفكـير
اما تصير بموقفن يرفع الراس = ولا عساها ما تحقق ولا تصير
قدلي ثلاث ايام حاير ومحتاس = الحال مـابه خير واقول انا بخير
خايف تشمت عاذلن فيه وسواس = مهما تصاغرني احس اني بخير
من زود همي ماجذب عيني نعاس = كن السهر حاتم وعيني مسايير
كل النتايج تعترفلي بالافلاس = واضحك على نفسي واسوق التباشير
ياحض ليتك تحشم معرب الساس = ماكان جاني منك زله وتقصير
مابيك تغريني بضحكه ومجلاس = لو القناعه كنز عندي انا غير
لاما اقتنع بالطيب بحدود وقياس = يكبر فعين الغير وفي عيني صغير
وان قلت شوف فلان يحطب بلا فاس = بقول لوبه خير ما عافه الطير
هذا وسجل يا قلم فوق قرطاس = ابيات ما ودي تمر دون تفسير
اللي يبي صيتن وذكرن بنوماس =يقضي حياته ما يحسب المخاسير
واللي يشوف الصح في فعل جساس = تشوم نفسه عن فعل سالم الزير
واللي ما حـاش المجد بالدرع والطاس = ماهي بعـيده لو يـذم المناعير
واللي ماتطرب نفسه لفزعة دباس = من دون فزعاته يحصل معاذير
يقوله اللي فوق خشم الخطا داس = وطويق ما يشره على قاعة البير