يا بعد نوم الليل عن حجر عيني
الشاعر الكبير في موهبته وعطائه الشعري وبإنسانيته وتعامله الراقي مع الجميع أحمد الناصر الشايع فجع قبل شهرين أو أكثر بموت ابنه الأكبر الشاعر محمد الأحمد الشايع - رحمه الله - وقد شاركه أحزانه الكثير من أبناء الوطن بمختلف فئاتهم، لكن يبقى حزن الأب لفقد ابنه أكبر من كل شيء رغم اليقين الصادق بأن الموت نهاية كل حي.. شاعرنا كتب هذه الرثائية الباكية .. ويقول فيها:
يا بعد نوم الليل عن حجر عيني =صبر على ما صار من وال الأقدار
صبرت صبر باح منه الكنيني =أضحك مع العالم وكني على نار
ما غير أهوجس بين نفسي وبيني=يعلم بها العلام في كل الأسرار
تقل اتحرى لي علوم تجيني =مع الطروش اللي يجيبون الأخبار
فهمت رأس العلم من كلمتيني =من يوم قالوا جا محمد ونصار
تكسّرت عقبه جرايد يميني =عز الله اني عقب ما صار صبّار
من عقبها ونيت لي ونتيني =ونة غريب بالخلا ضاع واحتار
لولا الله أبرك ثم قوة يقيني =لا طير مثل الطير من كف صقار
تخنقني العبره وأفرّك يديني =واحترت مثل مصالي النار والغار
علم يخلي كل قاسي يليني =كنه على قلبي رصاص أم كرار
الى ذكرت عياله المصغريني =هذا يعزيهم وهذاك زوار
احد على جنبه واحد له ونيني =جتني هموم القلب من كل الأقطار
قلت اصبروا والله مع الصابريني =الله يكافيكم صواديف الأشرار
عسى عوضنا الحي بالميتيني =ناصر ونايف ذخرا سر واجهار
وأحمد وعبدالله ذرانا الحصيني =صغار سن وان بدا اللازم كبار
يجبر عزاي اللي بخلقه ضميني =محيي العروق الميته عقب الأمطار
مالي عن المكتوب فوق الجبيني =لو رحت شرق وغرب ويمين ويسار
صليت نصف الليل لي ركعتيني =أطلب له اللي للخطيات غفَّار
خفف ذنوبه يا أرحم الراحميني =في ماقفٍ ما ينفعن فيه الأعذار
جعله برضوانك من الفايزيني =بالماقف اللي به يضيعن الافكار
في ماقفٍ به كل خافي يبيني =تمت وصلى الله على سيد الأبرار