عسى الله يعتني بمشـرفٍ قبـل ظـلام الليـل = عليه وغابت الصفرة عصير وضاعـت آمالـه
بدى المشراف قدله من صلاة الظهـر بالدربيـل = ولا حقـق لـه الدربيـل شـيٍ دار فـي بالـه
تخيل وش شعوره يـوم حـول يلتفـت ويخيـل = العدٍ قـد تواجـه هـو ومحبوبـه علـى جالـه
عفى الله عن عيونه يوم عود والدمـوع تسيـل = يجـاذب ونتـه ويـدق زوره يابـري حـالـه
غريمٍ والزمن خصمه ولا بالييد حـل او حيـل = ضعيفٍ جالـبٍ همـه عنـى وقتـه وغربالـه
مريضٍ طاوله وقته وخانـه ليـن هـد الحيـل = وقفـى جعلـهـا قفـايـةٍ مــن دون قبـالـه
ضمانٍ ينتظر دوره ومن حضه حصـل تأجيـل = وعود يجـرح السانـه لهاتـه والضمـى فالـه
صبورٍ يبنـي آمالـه ولاكـن الزمـان بخيـل = حزينٍ تـذرف عيونـه دموعـه كـل ماجالـه
بطاري صاحبه ناسٍ تسولـف قصدهـا تأويـل = تبيـن ماخفـى للـي جهـل بالقيـل والقـالـه
عبادٍ مانقضت واليا انقضت جى من بعدها جيـل = علـى درب النميمـه كـل منهـم جـر موالـه
سقى الله يوم انا اقصى طموحي في ركوب الخيل = وسقى الله يوم انا في جنب ابـي واقلـد افعالـه
صغير وينشرح بالي ليـا سويـت دلـة هيـل = واسوي مثل ابي فـي شـرب فنجالـه ونزالـه
ولا اعرف عن دروب العشق دربٍ مرجعه تعليل = ومشراف الحزيـن اجهـل بمطلاعـه وحوالـه
مريضٍ يامحمد وانتخيتـك يـوم ريـت الويـل = لحيثك عـارفٍ ماقصـدي انـك سالـيٍ دالـه
تراني يارفيقك في الزمن مابيـن عـدل وميـل = همومي ماحصل لي منصحن لجـل اشتكيهالـه
عسى الله مايسامح من نقل هرج القفـى والقيـل = وقطع حبـل المواصـل بيننـا بـت الله حبالـه
نقل لـه هرجـةٍ والله ماتسـوى عليـه الشيـل = لحـسـادي وحـسـاده وعـذالـي وعـذالـه
ولاكن وش حصل وش ماحصل تبغالها تحليـل = عن الجرح القديييم وقصة الـي شـرف لحالـه
وعود يامحمد يوم خـاب الظـن فـي الدربيـل = يجاذب ونته ويـدق زوره يمكـن اشـوى لـه
تخيل وش شعوره يـوم حـول مقتفيـه الليـل = عصير وغابت الصفره عليه وضاعـت آمالـه
لــــ صالح ال مانعه