يا رجم ما عينت لي كـل شغمـوم فحول الرجال اللي تشيـل الثقالـي
كم شاف رجمك من مناعير وقروم ويا ما نزل حولك من الناس غالي
*أسياد سنو للعرب شرع وسلـوم اللي لهـم قـدرٍ رفيـع و جلالـي
اللي ذبايحهم مـن العقـر الكـوم أكبار الصحـون متعبيـن الدلالـي
الى ذكرت فـلان وفـلان مرحـوم قربت محاضيبي وضـاق المجالـي
من دونهم ما كن مضى لي ولا يوم الله أكبر ما أسرع الوقـت زالـي
وجدي عليهـم والتوجـاد مذمـوم عليهم أصفـق باليميـن الشمالـي
صادتهم صدوف المقادير بسهـوم وطوتهـم الايـام طـي الحبالـي
هذي منازلهم بنـا فوقهـا السـوم ارضٍ خلا من باني البيـت خالـي
وهذي مبانيهـم هدامـات و ثلـوم علـى بقاياهـا القبيسـه تلالـي
وقفت فيها شارد الذهـن منجـوم بين الحقيقـه والحـلام و خيالـي
(صح الله لسان الشيخ محمد بن منيخر على هالقصيده الي هيضتنى واحزنتنا في نفس الوقت والله يعافيه ويرده سالم من رحلة علاجه في الخارج...ولاهنت ياخوي الذهب وماقصرت)