[علي العايد الهاجري]

لا صرت ما ترغب بما تستطيعه
مـا تستطيعه كان به صرت رغبان
وإن جاك شراي على طول بيعه
بعض التردد يخسرك وأنت ربحان
والحرص واجب والنوايا وسيعة
وإخذ الحذر من اللي تعامله بإحسان
ومـا كـل مـا تسمـع لـزوم تذيعـه
لا صرت ما تملك من القول برهان
وإن كان ما طاعك زمانك فطيعه
ترى القناعة كنز في كل الأحيان
والصاحب اللي صد ناوي قطيعة
مـا عنه منشـود ولـو عـاد نـدمان
تكـرم لحـانـا مـن دروب الخديعـة
عـاداتنـا نـوفي ليا من الردي خـان
والصـدق منـا والصـراحـة طبيعـة
وحب الرجال اللي لها المجد عنوان
ونفرح بشوف أهل السنن والشريعة
فـي مجلـس مـا فيـه زور وبهتـان
فـي مجلـس مـا فيـه نفـس وضيعـة
ولأهل الوفا نذبح لهم حيـل وسمان
ونفــز لــه ونقــوم قومــه سريعــة
رجـل نصـانـا مـا يحقـر ولا يهـان
يا صاحبي دام الهجـر فيـه ضيعـة
ما في القطيعة خير يا ذرب الأيمان
لانــي بــلا تبــع ولأنــت بتبيعــة
وترى الوصل راعيه ما هو بخسران
خليــت عنـدك يالسنــافـي وديعــة
أبيـك تحفظها على مــر الأزمــان
اللي حصـل مـن بيننــا لا تشيعــه
ما قلت لك خافي ولا قلت لي بان
ولا صارت النفس الشقية جويعة
أعـوذ بالرحمـن مـن كـل شيطـان
ولا صـابني جـور الزمان بفجيعة
أنصـا بنـي عمـي ولانـي بحيـران
ربعـي ليـا ضاقـت علي الوسيعــة
هم درعي الضافي ليا صرت بلشان