السلام عليكم ورحمة الله وبركاته
ومساكم الله بالخير جميع
هذي ردّية بيني وبين الشاعر ابومحمد
" عيد بن شدقان "
مناسبتها كان عندي عشا وكنت ملزم على أبومحمد يجي للعشا
لكن للأسف ما حضر العشا ودزلي القصيدة بمسج على الموبايل
يتعذر بدوامه وطبعا ً ابومحمد يعمل في المطافي كما هو واضح في ابيات القصيدة
وأنا حبيت اطول السالفة واتشره عليه بهدف المزح ليس إلا 
وإليكم القصيدة
عيد بن شدقان
ودي على المسيار صوب المناعير = لكن دوامي ماسك ٍ بي ارباطه
اطوي وافل الهوز وافتح مواصير= وانطح ليهب النار وألفط لفاطه
وهذا وانا اللي كني امخالف الخير= وصارت حياتي كلبيها شطاطه
أبومبارك
يا مرحبابك عد نبت النواوير=يامرحبا باللي عجبني اهياطه
اثر المطافي مناطح ٍ للطوابير= قربو المشهّر واللا فكّو ارباطه
مهوب هيّن واللا قله على خير= وين التعب ياخيك وين الشطاطه
يابو محمد خلّ عنك المعاذير = طبع التغلّي زايد ٍ في نشاطه
راعي محل ياعيد ولامن مخاسير=حبيت اداوي الوضع قبل انفراطه
عيد بن شدقان
ابك البقا تحصى بكثر الدنانير=واعداد طير ٍ هد وارخى ارباطه
للصاحب اللي له معزه وتقدير=يومه تهزّا وقال مكثر اهياطه
مهوب هيّن يوم ردد على خير=ماشاف يوم ٍ اختلط به اخلاطه
نار ٍ معا دخانها حزت اعصير=تاكل حديد ٍ صلب بكل انبساطه
وان كانها مناطح رجال وطوابير = ابشر بطير ٍ يعجبك بانخراطه
أبومبارك
ابومحمد ريف ركب المسايير=إليا لفاه الضيف زاد انبساطه
القلب مرباعه وحبه مغاتير= ترعى الخزاما والنفل والحماطه
والشك زايل يا عذاب الغنادير= مايلحقك شك ٍ ولابك عباطه
هذي رسايل ورادات ومصادير=وحنا نطرزها سواة الخياطه
الله يوفقنا لحسن التدابير=والله يثبتنا ونمشي سراطه
إن غبت قلنا جعل دربك مسافير=وإن جيت أغلى منهو ياطا بلاطه
والخاتمه ياعيد تصبح على خير= لاهنت وماقصرت يابو الشطاطه
وسلامتكم