رحلتي إلى أوربا صور

[خيال البلها]

مرحبا أخواني الكرام أعضاء شبكه العجمان

اليوم بسرد عليكم رحلتي بأوربا طبعا مع الصور

الأقلاع كان من الكويت الى مطار فرانكفورت

والوصول وتأجير سيارات اللي كان لها حجز مسبق عن طريق الانترنت وكانت عباره عن سيارتين مرسيدس S 350 2006



طبعا كان المبلغ 700 دينار تقريبا للسياره الوحده لمده 25 يوم عن طريق شركه اليوروب كار

خذينا سياراتنا وحركنا من فرانكفورت بالمانيا الى العاصمه النمساويه فينا وكانت المسافه تقريبا 800 كيلو متر
بس الصراحه ماتحس بالطريق سيارات جديده ومناظر ولا أروع

وصلنا فينا ولله الحمد وسكنا فندقنا وجلسنا فيها 6 ليالي



وهذا صوره الكنيسه اللي بسنتر فينا

والله بيني وبينكم فيننا ماتسوى القعده فيها 3 ايام بالكثير

وتصلح للعوايل اما حنا شباب ماتصلحلنا ابد

بعدها حركنا من فينا الى قريه زل ام سي بالنمسا وكانت المسافه بين فينا وزل ام سي 400 كيلو متر

يا جماعه كانت قريه حلوه بصراحه وهاديه حيل



زل ام سي عباره عن قريه بوسط جبال الالب وقريه صغيره مو ذات الكبر
وحواليها قرى صغيره حلوه مثل كابرون وسالفدين وتبعد عن ميونخ بالمانيا تقريبا 180 كيلو متر وتبعد عن سالزبورغ وهي مدينه نمساويه ساعه تقريبا

زل ام سي يحيط فيها الجبال من كل صوب وتشوف التلفريكات شغاله بكل اتجاه
وتقدر تتزلج بالثلج في شهر 7 و8 بعز القيظ
انا السنه اللي طافت تزلجت بالثلج فيها لكن السنه هذي حاصرتنا الامطار حيل وغرقنا من كثر مطرهم وخلتنا ننحكر بشقه ماطلعنا واجد

وبعد 3 اايام من ايام مطيره وشفنا حاله الطقس بعد يقولون المطر اسبوع قدام
قلنا خلنا نحرك الى جنيف نلحق على المهرجان
والله حركنا من زل ام سي بالنمسا متجهين الى جنيف بسويسرا مسافه تقريبا 700 كيلو متر وكان الطريق بين جبال الالب وانفاق تشق الجبال وشلالات وكان المنظر خيالي

وانا انصح اللي بيحرك نفس طريقنا لايروح بالليل خله يروح بالنهار لانه راح يشوف العجب والعجاب بالطريق لانه لما جانا الليل بالطريق ضاقت خلوقنا



وهذي صوره كرنفال جنيف في ثاني ايامه وهو عرض للفرق من عده دول

ومثل ما انتوا شايفين بالصوره مره راكبه رحوول



وهذي بعد صوره ثانيه للكرنفال


ومن خلال قعدتنا في جنيف نروح نسير الصبح على بعض المناطق الفرنسيه القريبه مثل ديفون وآنسي وإيفيان



وهذي صوره لبحيره ديفون بفرنسا وهي تبعد 15 كيلو من جنيف



وهذي صوره بحيره آنسي وهي تبعد عن جنيف 60 كيلو متر وهي احلى بحيره قريبه من جنيف



وهذي صوره لبحيره أنسي من خلال ركوبنا بالطراد بجوله بالبحيره واخذت هذي الصوره من وسط البحيره



وهذي صوره لشاطئ بحيره أيفيان الفرنسيه والبحيره الموجوده فوق بالصوره نصها لسويسرا ونصها لفرنسا وانا اخذت هذي الصوره من الجانب الفرنسي

وعلى فكره مدينه ايفيان مشهوره عندنا بالخليج بمياها ومنابعها واللي يبي يعرف مدى شهرتها يروح يشتري من الجمعيات والسوبرماركت ماي ايفيان

وبعد جنيف تحركنا ورحنا لمدينه أنترلاكن بسويسرا بوسط جبال الالب وبقلب سويسرا




والله الصراحه كنت ابي ازور هالمدينه بس لمده يوم واحد بس من يوم شفت المناظر هذي قررت اقعد بالمدينه هذي 3 ايام



وهذي صوره من على الجو لمدينه أنترلاكن من خلال مغامره ركوب البراشوت اللي أنا ورفيقي قمنا فيها

وعلى فكره مدينه أنترلاكن تقع بين بحيرتين ويمر من خلال البحيرتين جداول متصله بالبحيرتين



هذي لحظه هبوط رفيقي بالبراشوت من بحديقه انترلاكن وقيمه المغامره هذي ركوب البراشوت ب 100 يورو

وبنفس اليوم رحنا اعلى قمه الجبل من خلال ركوبنا القطار واسم القمه توب اوف يوروب



وهذي الصوره للثلج من قمه جوفنباخ او توب اوف يوروب

تاخذ القطار من قريه قرين ورلد قطار يصعد فيك الى القمه من خلال انفاق يقص بقلب الجبل

الى القمه الثلجيه تستغرق الرحله تقريبا ساعه بالقطار وراح تلقى استراحات ومحطات بالطريق ومطاعم حلوه

واذا وصلت القمه راح تلقى مطاعم بوسط الثلج ومحلات تأجير معدات التزلج ومرصد فلكي وكهوف جليديه

وانا انصح اللي يروح ياخذ الخرايط للقمه من عند حجز تذاكر القطار علشان يعرف وين الاماكن التزلج والمنحدرات الخطره لما يتزلج بالثلج لانه في اماكن للمحترفين وفيه اماكن للمبتدئين نفسنا



وهذي صور الثلج ولاحظ الصوره حنا فوق الغيم والغيم تحتنا يحول من انك لاتشوف القرى اللي تحتك




وهذي صوره البحيره من حديقه فندقنا وكان بعد خلف الفندق شلال كبير يطل على غرفتي



وهذا الشلال اللي مطل على دريشه فندقنا



وهذي صوره لمن ركبت التلفريك وواضح عنكم بيوت وهي قريه قرين ورلد

وبعد جولتنا قررنا نروح باريس
واهي تبعد 700 كيلو

والللي يجي باريس ومايصور برج ايفل ماعنده سالفه



حاولت اصعده كذا مره بس من كثر الزحمه ماتقدر كل ما اجي اهون اني اصعده من كثر الزحمه



وهذا صوره لمتحف اللوفر اللي فيه العديد من اللوحات الفنيه والاثريه

طبعا اللي يشوف الاثار الاسلاميه والفرعونيه يدري انه الاوربين شكثر اسرقوا لما جوا استعمرونا



وهذي صوره الموناليزا من كامرتي وطبعا كان ممنوع التصوير للموناليزا بس الربع غطوا علي وصورت بكامرتي



وهذي صوره حديقه اللوفر



وهذي صوره لديزيني لاند بباريس الصراحه مكان حيل رائع

وأحلى شي فيه أستيديو ديزني لاند فيه عروض حلوه حيل وعروض سينمائيه حيه وهذا كان من احلى الاشياء بديزني لاند

وبعد قضاء مده حلوه بباريس

رجعنا من باريس الى فرانكفورت مسافه 600 كيلو ومن ثم العوده الى الكويت

وارجوا ان يكون الشرح وافي وانكم استمتعوا بسرد رحلتي

[بنت حمران النواظر]

يعطيك العافية عالصور الحلوة


المناظر الطبيعية ولا اروع
خصوصا هالمنظرين عجبوني حيل





تسلم خيال البلها عالصور ووصف الرحلة...

[زبون كيمو]

خوش رحلة
أمتعتنا
والله لا يهينك

[™ عبد الله ™]

تصدق وانا اقرى الموضوع واشوف الصور .. حسـّـيت اني استبـردت اشوي ههههههههههههههه

خوووش رحــله يا خيال البلهاا .. ومناظر ولا اروووع
وبصراحه طلعت فنـّـان في اختيار اماكن التصوير


شكرا لك واحجز لي معك الصيف الجاي

[سعد القوي]

ابدعت الله يعطيك العافيه




ياعمري ياباريس

[الفردوسى]

مجهود واضح وابداع مميز نشكر الأخ الكاتب عليه .

[فيصل المخيال]

السلام عليكم و رحمة الله و بركاته

الأخ الفاضل خيال البلها المحترم

أولا
الحمدلله على سلامة الوصول

بالفعل صور رائعة جدا والتعليق عليها وافِ و جميل
لقد تنقلنا معك خلال هذه الرحلة من فراكفورت إلى فينا ثم باريس
وإمتعتنا بهذه المناظر الجميلة للقصور والحدائق والمهرجانات والثلوج والجبال
( سوف نعتبره إهداء لنا تستحق عليه شكرنا وثناءنا )

تقبل منى أجمل وأرقى تحية

[خيال البلها]

أختي بنت حمران النواظر ... مروركي هو أروع من المناظر الطبيعية وفي صورة راح أنزلها بالثقرير التالي وهي اهداء لكي ... تقبلي تحياتي .
أخي زبون كيمو .... شكرا علي مرورك طال عمرك .. تقبل تحياتي .
فتي البزازبيز .... هههههههه والله أتشرف بخوتك خلاص جهزك نفسك الصيف الجاي .
أخي سعد القوي .... شكرا علي مرورك طال عمرك .. وتقبل تحياتي .
أخي الفردوسي .... شكرا علي مرورك طال عمرك .. وتقبل تحياتي .
أخي الفاضل وأستاذي الكبير فيصل المخيال الله يسلمك طال عمرك وهو شرف كبير علي لمرورك وتعليقك الرائع ... وتقبل مني فائق الاحترام

[عجمي ولي الفخر]

لا هنت على هالصور

والحمدالله على السلامه

وصدق مناظر رووووعه

ثااانكس

[خيال البلها]

أخي الكريم والمحترم ...... عجمي ولي الفخر
الله يسلمك ويبارك فيك ..
اسعدني وجودك ...
ولك مني اجمل واطيب تحية وتقدير لشخصك الكريم ...