من اروع قصايد الشيخ بطيحان ابن منيخر رحمه الله

ابن منيخر · #1 07-10-2004, 03:27 AM

بسم الله الرحمن الرحيم

اخوتي الكرام اضع بين ايديكم قصيده من اجمل القصايد للوالد الشيخ بطيحان بن محمد ابن منيخر حيث يقول:

الله من غيض كتمانه بالجاش=بين الحنايا جاثم طول الازمان
منه الخطر يجلب على الروح الابلاش=روح اتروح بها الاماني والاشجان
نخفيه الايدري به الخبل واللاش= اللي على جور الدهر دوم عوان
والراس من كثر الهوجيس منداش=يعل ماهاذي وساويس شيطان
لاني لاكاتب ولاني بفراش=ايضا ولاني باسط وسط دكان
رزقي على اللي رازق كل من عاش=رزاق في غبات الامواج حيتان
وان كانها زادت موزين الاوباش=يالله لاتهفي للاجواد ميزان
ولاترى الانذال مافيهم اعراش=هزلا لو انهم مستصحين وسمان
خطوى الولد راحت حياته على ماش=بالمرجلة قاصر وبالدين خسران
ماهوب امرتاح بوقته ولو حاش=اموال قارون مع مال هامان
والنفس لوطاوعتها صرت غشاش=تبغي لها زود وترجع بنقصان
والذيب ماعنده ذخيرة ومعتاش=وان عسمت يصبر ولو كان جيعان
والله ماني للجحارة بنباش=لو كان بعض الناس لرمي نيشان
وان ضاق صدري قلت باروح طراش=اخير من هلباجة بين جدران
شفي ادلال عندها صوت مهباش=يعبى لها كيف النشاما بكيسان
في منقع ريخ النفل ينعش انعاش=خص الى صابه من الولي ودان
وانجا نهار فيه ديم ورشراش=هذاك عندي من ليال بن سران
وياماحلى طلعت النور مغباش=مع صحصحا ماذكر به نجع شوان
ارض خلا مداج به ضين وادباش=ماطبه الا الصيد والذيب سرحان
من فوق جمس له مع الخد نشناش=متخيرينه من حسينات الالوان
توه جديد قيمته سلمت كاش=ممتاز في شكله وبالمشي بطران
عليه ربع مابهم يذكر اللاش=والكف تنقل نادر ماله اثمان
فرخ الحرار مصخر الجول لا انحاش=لامن تخافق مع حلول المسيان
قاطع الى من مخلبه للحم ناش=قص العظام ويودع الريش نثران
مغتر قطامي والنحر كنه الشاش=وان فرعوبه كن في العين ديبان
من موكر ماهو قريب من الطاش=شكله غريب من صواريم حوران
من شامخات مستقلات واحراش=ماهوب وكري شابكه عود هتمان

فيصل بن حجرف · #2 07-10-2004, 03:50 AM

رحم الله الشيخ بطيحان بن محمد واسكنه الله فسيح جناته
قصيدة من اروع القصائد اخي العزيز ابن منيخر وان كان عندك المزيد من قصائدة ارجو انك ماتبخل بها علينا

العماني · #3 07-10-2004, 04:57 AM

الله يرحمه ويسكنه الجنة

لاهنت يا امنيخر على القصيدة.

تقبل تحياتي،،

ابن منيخر · #4 07-10-2004, 05:05 AM

وقع خطاء في البيت 12

وابشر بسعدك اخويAIajman

الهتلاني · #5 07-10-2004, 09:27 AM

الله يرحمه يسكنه الجنه
ولاهنت ابن منيخر
على نقل القصيدة

ffahad · #6 07-10-2004, 10:49 AM

الله يرحمه يسكنه الجنه
ولاهنت ابن منيخر
على نقل القصيدة

وبو بطى لة قصائد اجمل من هذة القصيدة الجميلة

محمد أبو زيد · #7 07-10-2004, 03:32 PM

رزقي على اللي رازقٍ كل من عاش &&& رزاق في غبات الامواج حيتان

الله يرحم ابو بطي ويسكنه الجنه

ابن منيخر لاهنت على نقل القصيده

لكن فيه طلب لو سمحت

بطيحان الله يرحمه له قصيده اكثر من رائعه

وعلى حسب علمي انه تحدى بها الشعار

منها اللي يقول فيها

كلها همس في همس

وتقبل تحياتي

اخوووك / شديــد البــاس

ابن منيخر · #8 08-10-2004, 02:04 AM

بسم الله الرحمن الرحيم

اشكر جميع الأخوه الذين اضفو ردود اخي العماني والليل
وffahad وشديد الباس وبنسبه للقصيده التي ذكرته اخوي شديدالباس التي يقول في مطلعه:

يابوفهد ماحلا هدت الطير=وقت العصير ولا بعد غابت الشمس

سوف تطبع في كتاب يصدر قريبا انشاء الله يحتوي على قصائد الوالد رحمه الله وجزاكم الله خير والله لايهينكم

متعب الوقت · #9 08-10-2004, 05:49 AM

الله يرحمه ويسكنه الجنه

الشجاع · #10 08-10-2004, 06:56 AM

الله يرحمه شاعر فطحل