مــــــاجــــــور من ربــــــاك..!!!

[حسن العرجانى]

السلام عليكم ورحمة الله وبركاته

قصيده جديده اتمنى ان تحوز على رضاكم

أنا البارحة لجّت علي من هنا وهناك = هواجيس لا عادت ولا اللي مسببها

واريّح على الكرسي واوقّف على الشباك = أشاهد انجوم الليل سمّار وارقبها

واسولف على روحي واعمّر من التنباك = وبعض الزقاير والعه دون ما اشربها

ولا من زهقت التتن بدلت بالمسواك = واعد الدقايق طول ليلي واحسّبها

أيا مخبر العاشق عن الورق فوق الراك = وعى الدرس واستاثق امورٍ مكذبها

وألا يا دقيق القد كل الحكي ينصاك = اصدودك وهجرانك معي ويش موجبها؟!!

عليك الملامه من جبينك إلى ماطاك = قلوب البشر ماهي بلعبه وتلعبها

بعد قلت لك خذ قلبي وهاك..وهاك..وهاك = تخيّر باحاسيسي ولك مني اعذبها

تجرّى بما سويت يوم اللعين اغواك = وكل الحقايق واضحه كيف تقلبها؟!!

متى جيت لك منّا تخارج معي مناك = واذا جيت لك مناك..منا تشقلبها

لك بكل يومٍ حال ماجور من رباك = أظنه تعب يقرا اشفوفك ويكتبها

علاقه سقيمه لا هنتني ولا تهناك!! = أنا كل ما ابنيها تعود تخربها

ولايستوي تقديم عجفاك معْ سمحاك = ومن كرّم اللحيه يكرم شواربها

بعد حانت فصول النهايه وعلمي جاك = بقى كلمتين اسمع لها زين واقضبها

كبيره على مثلي يقدر مثل شرواك = عليك البرا مردود كلمه وابرّ إبها

ولك الحق تزعل..لكن افداك من راضاك = جهلنا . تعلمنا . تعلم وجربها

يقول المثل من صد عنك عطه علباك = إلينه يميز خايب الناس واطيبها

وسلامتكم//// حسن العرجاني

[محمد سالم الشاعر]

صح اللسانك يالعرجاني وتسلم يمينك....

عليك الملامه من جبينـك إلـى ماطـاك=قلـوب البشـر ماهـي بلعبـه وتلعبهـا

[اطياف الماضي]

يقول المثل من صد عنك عطـه علبـاك إلينـه يميـز خايـب النـاس واطيبهـا

صح لسانك يالعرجاني


تحيتي

[ماجد المهنا]

السلام عليكم ورحمة الله وبركاته

حسن العرجاني

واسولف على روحي واعمّر من التنبـاك = وبعض الزقاير والعه دون مـا اشربهـا
ولا من زهقت التتـن بدلـت بالمسـواك = واعـد الدقايـق طـول ليلـي واحسّبهـا

الله يفكك منها ويقديك عالمسواك


صح لساااانك


مدد ماهوب عدد


لاهنت على كل حال

[فيصل بن حجرف]

ارحب ياحسن
وصح لسانك على القصيده الرائعه
ونتمنى ان نرى المزيد من ابداعاتك في هذا القسم

[فيصل المشوط]

السلام عليكم ورحمة الله وبركاته

الله لايهينك ياحسن

وبصراحه كل القصيده

فوق الجيده والمنتازه

وتستحق الوسام وبتقدير

مرتبة الشرف

فـــيــصــل

[الباشا]

صح السانك يا حسن

قصيده جزله بمعانيها والاجمل من كل هذا كاتبها .

[جريح الكويت]

صح اللسانك يا القررررررم ولاهنت


تقبل ارق التحيات

[مـحمـد]

ماشاءلله
صح لسانك ياحسن ولاهنت
قصيده اكثرمن رائعه وسلمت .

عليك الملامه من جبينك إلى ماطاك /// قلوب البشر ماهي بلعبـه وتلعبهـا

[ma0z]

صح اللسانك يالعرجاني وتسلم يمينك....