السلام عليكم ورحمة الله وبركاته
انا حبيت ان انقل لكم هذه الأبيات التي تلعب بالفرينسي{الصفوف}
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــ
..(1)..
يالله طلبناك يالمعبود وانـت الكريـم
يـا عالـمٍ فـي لياليهـا وبأيامهـا
زانت لنا يا هل الشيله وهبّ النسيـم
صوت الرعد صوتها والبرق قدّامهـا
يا مرحبا بالحضور وكلّ قرمٍ حشيـم
إعداد ما تمضـي الأيـام وأعوامهـا
حنا المرازيق لا جار الدهر والخصيم
جلابـةٍ للعمـار بسـوق سوّامـهـا
يدري بنا الشايب الأول ويدري الفطيم
وتدري بنا ساير العربـان وإيمامهـا
يوم الجزيره تواقد مثل نار الجحيـم
راياتنـا عاليـه وترفـرف أعلامهـا
عيناك ياللي لها عند الحويّـر رزيـم
عيناك ياللي شعرها يوصل احزامهـا
وين أنت يا راعي التاريخ كانك غشيم
ظلمت حظّك ونفسك وأنـت ظلامهـا
هذي سوالف هل العادات كانك فهيـم
خلّوا ذلوله تروح وتسحب إخطامهـا
.. ( 2 ) ..
سلام يا اهل الوفا وافيـن الأشبـار
وإعـداد مـا هـلّ همّـال برديّـه
يا مكرمين الخوي والضيف والجـار
منّـي عليكـم سلامـي والتحـيّـه
يا لابتي يا هـل الفزعـات والكـار
يـا كاسبيـن المراجـل والحميّـه
هذا جزا اللي عليهم يشعـل النـار
يا محرّك النـار عـاد النـار حيّـه
في ساعةٍ ما بها يمنـى ولا يسـار
ليلٍ سـرى بأمـر خـلاق البريّـه
يحنّ فيها الرعـد والبـرق سمّـار
هلّت على راس مـن قـاد السريّـه
جوه المرازيق ما شحّـوا بالأعمـار
وردوا على الموت ميـراد الضميّـه
عيناك يالشايـب اللـي ودّع الـدار
يوم القمر غاب من عقـب العشيّـه
يا ذيب ياللي تجرّ الصوت وش صار
صوّت على دار مـن همّـل خويّـه
يا مدّعي بالقصيد وبـدع الأشعـار
خلّيـت للقـوم فـي قـاعٍ خليّـه
.. ( 3 ) ..
يا مرحبا عند ربعي مزبن الجانـي
قومٍ لهم في نهار الهـوش ماريّـه
عزّوا لي الصفّ يا ذربين الأيمانـي
انا جنوبـي وحضّـرت الجنوبيّـه
من بعدها يا ضنى مرزوق بالعانـي
نبي ندوس الخطـر والنيّـه النيّـه
يا لابتي محزمي في يوم الأكوانـي
أهـل القنـازع مزبّنـة الجلاويّـه
اليا اختلط بالوغـا عـجٍ ودخّانـي
حريبهـم مـا يفيدنّـه عـزاويّـه
كم شيخٍ أمسى عشى للذيب سرحاني
وكبود ربعه علـى فرقـاه مكويّـه
يسقيش يا دارنا من غرّ الأمزانـي
يالله عسى مع دخول الوسم وسميّه
دارٍ نماريبها مـن عصـر جدّانـي
ونذود من دونها في مقـدم الهيّـه
.. ( 4 ) ..
ذعذع الغربي وقلبي معه ذاعي
ذاع هاجوسي حـروفٍ يغنّيهـا
يا سلام الله على الحفل والداعي
والتحيّه عدّ ما سـال واديهـا
قرّبوا لي يا هل الحفل مذياعي
ما يهيض الملعبه كود راعيهـا
لابتي لا من حضر كل طمّاعـي
يحتفل ميدانها مـن عزاويهـا
لحقت امهارٍ بها كـل فزّاعـي
جاعلين ارسانها في نواصيهـا
عوّد الطاروق والقلب نزّاعـي
جمرةٍ بالصدر مانـي بكانيهـا
يا عواذيل الهوا مالكـم داعـي
جنّبوا عن سكةٍ ماشـيٍ فيهـا
.. ( 5 ) ..
بأبدا بأسم عالي الشان
اللي يسـوق المخيلـه
سلام من قلب ولسـان
يا اهل الفعول الجزيلـه
عجمان لا قلت عجمـان
مـا نقتنـع بالهزيلـه
حنا ذرى الشيخ راكـان
من ضدّنا عزتـي لـه
يوم العيينـه وكنـزان
شلنا الحمـول الثقيلـه
ماراح ذبّـاح ضيـدان
والله مـا تـمّ ليـلـه
جينا على سرج وحصان
في ليل ما جاء مثيلـه
ثار الفشق وام تيجـان
تقدح بخشـم الفتيلـه
هذا عشا الذيب سرحان
الشيخ حامـي القبيلـه
لعيون خدرات الأعيـان
موج البحر نرتكي لـه
بأقولها سـرّ واعـلان
حنا السيوف الصقيلـه
قلتـه ولانـي بغلطـان
ما جبت بالهرج ميلـه
.. ( 6 ) ..
سلام رديّه علـى منهـو حضـر
على جميـع كبارهـا واصغارهـا
ياللي سرى ليلك على نور القمـر
قصايدك ما قلت ويـش اخبارهـا
يا مقلّط الدلّه علـى جـال الجمـر
عزّ الله انك مـا ظبطـت ابهارهـا
ياللي بغيت العلـم منّـا والخبـر
جتك العلـوم طوالهـا واقصارهـا
حنا ترانـا اللابـه اللـي تفتخـر
عند الخوي والضيف والا جارهـا
اهل القنازع باللقا واهـل الظفـر
لا ثـار بالميـدان عـجّ امهارهـا
مثل السحاب اللي على الوادي حدر
سيله اذا جا القاع شال احجارهـا
يوم الفشق كنّه مثل وبـل المطـر
من مزنةٍ ترعـد وتقـدح نارهـا
كم شيخ قومٍ قد نواهـم وانكسـر
خِلّي نهار الكون وسـط اغبارهـا
لعيون من غطّت نحرهـا بالشعـر
من زينهـا مـا هدّهـا حجّارهـا
وان طوّحت بالصوت ياطون الخطر
لا حنّت الخلفـه وحـنّ احوارهـا
تاريخها يشهد لهـا طـول الدهـر
كلٍ سمع فـي طيبهـا واذكارهـا
هذا قليـلٍ مـن كثيـر ونختصـر
ياللي بغيت علومهـا واشعارهـا
.. ( 7 ) ..
يقول منهو يغنّـي جديـد الطواريـق
من فرحةٍ داخل القلب يِسمـع صداهـا
يا مرحبا مرحبا يالوجيـه المطاليـق
ترحيبةٍ ما توخّـر بهـا مـن غلاهـا
تستاهلون اشقر البنّ والكيف لا سيـق
من دلّـة والمعـزّب مزيّـن سواهـا
يا طير يا طير ياللي تذبّ الشواهيـق
صوايـدك عـادةٍ لـك تنثّـر دماهـا
ربعي هل المدح فالضيق لا نشّف الريق
كم خيّرٍ طاح من ضربهـا فـي لقاهـا
يا دار يا دار ياللي حموش المرازيـق
ياميّـة صلـب جـدّي يـذرّي ذراهـا
كم من عقيدٍ يسوق الجموع المشافيق
بيارقه كسّـرت بالخـلا مـا وطاهـا
يا بنت ياللي تعب في هواش العواشيق
ما تلتفت للـردي لـو تمنّـى هواهـا
خيالها اللي يفكّ النشب حزّة الضيـق
واليا انثنى ينجـي التاليـه ويحماهـا
والختم منّي صـلاةٍ لسيـد المخاليـق
امبلّغ الناس بالدين ومجلـي عماهـا
.. ( 8 ) ..
قرّب المحماس والنجـر والدلّـه
سوّي فنجالٍ على الكيف يالغالـي
شبّ ضوٍ تجذب الضيـف وتدلّـه
تجذب اللي ساريٍ بالخلا الخالـي
وسط بيتٍ ما بني في طرف فلّـه
وسط روضٍ عشبه الوان وأشكالي
عند قرمٍ يذبح الحيـل طبـعٍ لـه
وان لفاه الضيف يبشر بالإقبالـي
ما يحسّب زايد المـال مـن قلّـه
دون ربعه يرخص الحال والمالي
ودّك ان المدح ياتي علـى حلّـه
ما يصير الا على طيب وأفعالـي
امدح الطيّب وخـلّ الـردي خلّـه
ما تساوى واطي القاع والعالـي
بنت ياللي تنقض الـراس وتفلّـه
وان مشت قامت تعـزّل تعزّالـي
تبغي الطيّـب ولا تبغـي العلّـه
تدري انه لو تميدح على الخالـي
جعل ما قلنـا بعيـدٍ عـن الزلّـه
والسلام يعـمّ شيبـان وعيالـي
.. ( 9 ) ..
يالله المطلوب يالوالـي
يا كريم الجود سبحانـه
لا بدينا بزين الأمثالـي
زان قول الشعر والحانه
هاتوا الدلّـه وفنجالـي
دلـةٍ بالهيـل مليـانـه
للحضور تصبّ وتشالي
مرحبا والنفس طربانـه
لابتي يا مزبن الجالـي
مزبنه من دون عدوانـه
في نهار الكون عيّالـي
لا اختلط عجّه ودخانـه
بنت يالله لبسها غالـي
كنها وسط البحر دانـه
ضامرٍ والعـود ميّالـي
والعيون عيون شيهانـه
ما تلفّت صوب الأنذالي
والردي ما شانها شانـه
عينها لمعـرّب الخالـي
تقصر الخطوه على شانه
.. ( 10 ) ..
يا راكبٍ تسعـه وسبعيـن
احمر وكـنّ فيـه طاقيّـه
اربع ميه وأربع وخمسيـن
يازيـن ممشـاه عصريّـه
ما يظهرونه مـع الحدّيـن
ياكـود يظهـر وجبـريّـه
عرّض على الحدّ ابو روفين
يبغـى الديـار الجنوبيّـه
صوت القزوزات وهو بثنين
صوت البلاجيـك بالهيّـه
يوم اعتزوا ربع ابن حثلين
وألفوا على الخيل ورجليّـه
الثار مـا نآخـذه بعديـن
ما ضـاع شـيءٍ لياميّـه
الصاع يوخذ له الصاعيـن
مـا ناخـذ الثـار غدريّـه
..(11)..
حان بدع المثايـل ثـم زان
والفريـده نجـرّ الحانـهـا
والهزايل تخالفهـا السمـان
والسمينـه لمنهـو صانهـا
تباريكٍ لكم يا اهـل المكـان
عدّ ما هلّت غيـث امزانهـا
مرحبا وارحبوا عدّ الطعـان
في نحور العـدا وأعوانهـا
ابصم ال لابتي واعطي ضمان
تشهد الـدار مـع جيرانهـا
ليل جانـا صويـبٍ بالبيـان
دقّت الحـرب مـع طيرانهـا
صوت شبّابها مثـل الكمـان
يطرب الخيل مـع فرسانهـا
لابتي إنسٍ وتشكيـل جـان
فوق خيـلٍ تجـنّ اجنانهـا
انتعاهد على كسـب الرهـان
والا موتٍ بأخـسّ اثمانهـا
ولعيون الخشف سيد الغـوان
ينصف الجمعين من شانهـا
.. ( 12 ) ..
شيلوا سرى الليل غاب القمر
شيلوا سرى الليل
صب الفناجيل للي حضر
صبّ الفناجيل
صفر المعاميل على الجمر
صفر المعاميل
ربعٍ مشاكيل هل الفخر
ربعٍ مشاكيل
ذبّاحة الحيل نزّالة الخطر
ذبّاحة الحيل
لا صِيح فالخيل جاها النذر
لا صِيح فالخيل
لا جنّ مقابيل يبيعون العمر
لا جنّ مقابيل
مهيب أقاويل جاك الخبر
مهيب أقاويل
شيلوا سرى الليل غاب القمر
شيلوا سرى الليل
.. ( 13 ) ..
يا مرحبا مـن صافـي النيّـه
ترحيبـةٍ مـن كـل وجدانـي
يا مرحبـا ميّـه علـى ميّـه
باللي حضر عن آل ( فلانـي )
اهل الكـرم والجـود والهيّـه
اللي لهـم بالطيـب عنوانـي
يا ما حلا المجلاس فـي فيّـه
وجمر الغضى من تحت رسلاني
وأشرب من الفنجال عصريّـه
وجريت من فكـري الألحانـي
وشوّشت يوم ان حـلّ طاريّـه
ياميّـةٍ بالهـوش شيطـانـي
ياميّـةٍ بالـهـوش يامـيّـه
شيخٍ لنـا بالحـرب راكانـي
حـذف الثيـاب فيـه ماريّـه
يوم اعتزوا بالشيـخ ضيدانـي
اهـل القنـازع نارهـم حيّـه
بمشوّكـاتٍ صنـع نجـرانـي
.. ( 14 ) ..
عزّوا الصفّين يا ربعنـا الليلـه
عزّوا الصفّين شيـبٍ وشيبانـي
الفـرح جانـا وبانـت تماثيلـه
جيت أبارك عند ذربين الأيمانـي
مرحبا عدّ السحـاب وهماليلـه
مرحبا باللي حضر قاصي وداني
عدّ برقٍ لاح ثـم أنـدرج سيلـه
مرحبا من صدق قلبي ووجدانـي
عند قـرمٍ مـا يبـرّد معاميلـه
مكرم الضيفان والجار والعانـي
عند ربعٍ تكعـم الضـدّ وتزيلـه
تكعمه ويردّ خايـب وخسرانـي
ربعي العجمان لا قلّـت الحيلـه
يشهد التاريخ من ماض الأزماني
من تحدّى لابتـي بيّتـوا حيلـه
لابتي سقم المعاديـن عجمانـي
من قديـم الوقـت والا مقابيلـه
صلب يامٍ لا رقص كل شيطانـي
من حضر لا هان ولا تعبت رجيله
ومن تغيّب يحفظه عالي الشانـي
والصلاة اعداد ما بانـت الليلـه
للنبي اللي هزم ديـن الأوثانـي
.. ( 15 ) ..
يقول منهو بدع لـه قـاف
قـافٍ جـديـدٍ يغنـونـه
يا ما حلا ذبّـة المشـراف
والاحي الـورق ولحونـه
اتعبت رجلي من الوقّـاف
ما شفت شيءٍ تشوفونـه
الله على الجمس ابو كشّاف
اليا مشـى حـدّ طبلونـه
الزيـن روّح ولا ينشـاف
خلّى عشيقـه ومضنونـه
يلعب بقلبي كمـا الهـدّاف
لا جـاب قـولٍ يحيّونـه
الحكم حاكم علي بإسـراف
راضي بحكـمٍ يحكمونـه
وصلّوا على سيّد الأشراف
محمـد الخلـق يفـدونـه
..منقول::
17-04-2010, 09:43 PM
الأبيات التي تلعب بالفرينسي{الصفوف}
العرض العادي
