فاجعة في بنت ..؟!
--------------------------------------------------------------------------------
البنية التي قيلت فيها القصيدة عقب ماصار عمرها ست سنين فزت سبحان الله
الله معطيها جمال بالحيل جميلة يعني وجهها مدور وأبيض وعيونها وساع وحليلة
ومربيتها أمها تربية حشيمة ملبستها ثوب ضافي الين يدها والفستان واصل الين رجليها
وتحنيها مع يديها , ماعندها الا هالبنية , والبنية وهي بالبيت لعبها وحركتها
مالها حس مهيب توذي ولا تكسر شي ابد مالها حس .!
إذا ابوها يسلم عليها كل مابين كلمتين " جعلك في الجنة يا أبوي " إلى ناداها
تقول لبيه .. هالبنية كبرت ووصل عمرها الـ12 صحتها زينة وبدا يبين عليها
امارات البلوغ يصير عندها استدارة الورك وبروز الصدر فلبسوها ثوب وسيع
وعلموها التخفر من هالحين صار عمرها في الطعش ثلاثطعش أربعطش المهم ان أبوها
يغليها تسوى عنده عيونه .. ومره باحد ليالي الشتاء وهي قاعدة مع أبوها في ,
مجلس القهوة قالت : تبي تقهوى الحليب وإلا إذا صليت الأخير قال لا إذا صليت .!
يوم جاء عقب الصلاة وأثر الحليب بارد قال : يابنيتي .. قالت : سم لبيه
قال : جيبي لنا حطب من الحوش بس لاتروحين بالظلما خذي السراج معك
راحت البنية وحطت السراج على جنب وتلمست تجيب من الحطب عودان
لقت عود عودين وإلى هذا عوداً طويل وإلاه زين وجت تبي تكسره أخذته على ركبتها
وإلا عليها وقتها ثوب راهي وهي حافية لكن ماشاء الله متعودة على الممشى
مـع العلم مافيها مشق ويدياتها بيض وش حليلها مربربة .. يوم جت بتكسر العود وأثر العود
طويل مره ونقز العود وطق السراج وانكفى السراج وانكب القاز منه وطفى وهي
مابعد جمعت العودان اللي هي تبي قامت تلمس في الحطب تدور عويدات وأثناء
ماهي تلمس ومير تقرصها داب وتزعق ذيك الزعقة ويجون أهلها يركضون
ومافيه ذاك الوقت علاجات المهم حزموا يدها وسرى السم في جسمها ويوم يومين
ماابطت وتوفت الله الدايم .. بعدها حشت نفس أبوها عقبها فالأبو إذا بغى يجلس
وشاف الدريشة تذكر وقفتها عنده وإن جاء يشرب في ماعون ذكرها يوم تجيبه
له إن جاء للمجلس تذكر حسها يوم تقول لبيه ويقعد أكثر من ثلاثة أشهر على
هالحال إلى جاء الليل الأظلم يصلي ويدعي لها دعاء عسى الله لايحجبه
يقول في القصيدة ذي :
عفى الله عن عين حلا النوم جافيهـا=كراها قليل وذارف الدمـع محفيهـا
الى قلت الا يالعين هيـدي وهـوّدي=جرا دمعها الصافي وهلّـت عباريهـا
تبيّن فروع الصبح ما ذاقت الكـرى=ولا لوم عين فارقت شـوف غاليهـا
ولا زلّ يـوم او ليلـة مـا تعبّـرت=عن النوح اعزيّها ولانيـب قاويهـا
وانا في رجا جزل العطا علم بالخفـا=يلطف بحـال خافـي الهـم باريهـا
على نور عيني لب قلبـي ومهجتـي=تحنّ الضماير كل مـا حـلّ طاريهـا
حنين الخلوج اللي عن الضير فاختت=الى غاب عنها ساعـة مـا يباريهـا
وانا كيف ما ابكي طفلة غضة الصبا=حوريـة سبـحـان رب مسويـهـا
نشت بالهدى والدين والحق والبهـا=فلو طالـت الايـام مانيـب ناسيهـا
فيهـا طبـوع كـامـلات حمـيـدة=حنون على الجيران ووصال عانيهـا
عفيفة نظيفة جيب ما داست الخطـا=ولا هوجست بالمذهب اللي يزريّهـا
حشى ما بها من خافي العيـب ذارب=سوى حشمة الوالد فهذا فهـو فيهـا
كمل عمرها ثنتين مع عشر واربـع=سوى محترمها تسفهه لـو يحاكيهـا
خذت هجرة بالبيـت عنـدي قليلـة=أمانة وخذها الخيّـر اللـي عطانيهـا
فلانيـب جـزّاع فـلا شـك ولعـة=أعرف الأمانه ما لها غيـر راعيهـا
فيا سامع دعواي في مظلـم الدجـى=تمحـا خطاياهـا وتثبـت حسانيهـا
وتجعل لها في جنـة الخلـد منـزل=تقطف ثمر جنّـات طيبـة وتجنيهـا
وتعوضها في ما قصر مـن شبابهـا=برضاك يـا خلاّقهـا وانـت واليهـا
إلهـي ودودي دعوتـي تستجيبهـا=على النفس كله من غلاهـا مبدّيهـا
الا واتكـدّر خاطـري مـن فراقهـا=ولولا غلاهـا مـا تكلّفـت راثيهـا
(سمية) دموع المزن في غبة البحـر=سوى البنك ما يدرك ثمنها ويشريها
وانا مابي الا يـوم يطـرى سميهـا=عفى الله عن عين حلا النوم جافيهـا
وصلوا على من لا افترى سيد الورى=عدد ما جرا من رايح المزن واديها
-------------------------------------------------------------------------------
الشاعر / عبدالله بن دويرج
:: :: ::
::
:: :: ::
بتصرف من سالفة وقصيدة للراوي محمد الشرهان
31-08-2007, 03:30 AM
(فاجعة في بنت)
العرض العادي
