قصة فخر ..

شبيه اللول · #1 06-10-2011, 04:01 AM

ياهيه أنا بنت الرجال السلاطيـن
للـي بعينـه نظرتـن ماقهرهـا

على الفخر مابي شهود وبراهيـن
تاريخنا مثـل الجبـال وصخرهـا

ربعي هل التوحيد حّمايـة الديـن
من ماضي الدنيا لحاضر فخرهـا

حنا على حـد المدينـه مقيميـن
وأمجادنا في نجد محـدن نكرهـا

وقفاتنا عند أختـلاف الموازيـن
وأفعالنـا بالطيـب كلـن ذكرهـا

سيف الشجاعه في يدين الوفييـن
كم راس شيخٍ من متونـه بترهـا

(مطير) ساس العز بالعسر واللين
كم ربعوا بديـار شيـخٍ عمرهـا

عز القصير وسقم كيـد المعاديـن
لا دقت الساعـه وبيّـن خطرهـا

ليا أسرجو خيل الهقاوي من سنين
مثل البحر للـي بعينـه نظرهـا

بفعول وقفات الرجـال المسميـن
شيخان تحكم برهـا مـع بحرهـا

وشيوخنا بين القبايـل عزيزيـن
أدنهـم اللـي فزعتـه ماذخرهـا

يشهد لنا التاريـخ أول وهالحيـن
والحاضر اللي هيبتـه ماكسرهـا

ماجيت أبرر كلمةٍ بيـن قوسيـن
ولا جيت أبشرح سالفه واحتقرها

جيت بشموخي ياعذاب الامريـن
ماهمني سـود الليـال وكدرهـا

مضمون شعري يستثير العناويـن
قصة فخر كـل العبـاد أتخبرهـا

مادام لي في منبت العـز جديـن
وشلون ماأطول النجوم وقمرهـا

لي ماكرً من فوق وكر الشياهيـن
عن الوجية اللي تناقض صوّرهـا

ولي هامةٍ مـا تنحنـي للردييـن
ربي عن دروب الرديـه وُمرهـا

أنا شبيه اللول وأسمي له أثنيـن
أجزل حروفي بالوفـا يختصرهـا

أيه الزعيمه وافهموا يالمساكيـن
بنت الرجال اللي ينومس سطرهـا

والشامخه بنت الرجال المواليـن
افعالهـم بالطيـب كلـن ذكرهـا