" أهل نجران الكرام "
بسم الله الرحمن الرحيم
إلى أهل الجنوب " أهل نجران الكرام " أهدي لهم هذه القصيدة
بسم الله أبدأ فارض خمس الأركان . اللي ختم باليل ضوح النهاري
ذليل من لا كان عصمته الإيمان . ولا خاب من هو بالأمور استخاري
ومن بعد ذكر الله آبا اقول بلسان . وأبدي بشيء فيه واثق وداري
جابتني القسمة على ديار نجران . وكلن عن المقسوم ما هو بداري
ولجـيتي ما كان بالـبال حسبـان . وما كان قبل آجي عندي طواري
لأني بعيد ديار ما هو بنقصان . بأرض الجنوب وأنا بعيد مزاري
نسمع بهم بالطيب وبالوصف شجعان . وفي مدحهم كلن قصر بالمحاري
من الشمال من الهبايب والأمـزان . ومن وادي السرحان يبدا مساري
من جوف مارد والصعيدي وسرحان . ومن زعبل لكاف وسمر الحراري
ومن الحديـــثة و القــريات عنوان . ومن سهلة بسيطا وفيض الخباري
من الميسري و النبك دور وقلبان . ومن طبرجل والنباج وشغاري
وحرار ليلى ومن عرايس على صفان . ومحمية الخنفة لتيما يساري
وادعت أنا أحباب وصحبه وخلان . والقلب من فرقا المحبين ثاري
سافرت عن ناس لهم بالغلا شان . ربعي اليا مال الزمن و استداري
أولاد مكلب من سلالات قحطان . عون الصديق وخصم للي يماري
اللـي يمدون الـلـبن كل الأحيان . واللي لهم في كل عزم اقتداري
عنهم و في قلبي من الهم نيران . نويت بالممشا ولا به خياري
لدرة جنوب المملكة أرض نجران . يوم لفا التعيين دون اختياري
لخدودها و لسدها ماضي وأزمان . ولجبالها وسهولها و البراري
الله كساها من الحلا كل الألوان . و عطورها عود وبن وبهاري
وحسن الطبيعة في تلال ووديان . والمي والخضرة وزين العماري
لفيـــت ناس بالمكارم لهم شــان . اهل مواجيب بحسن الجواري
ناس لهم بالمرجله مجد و عنان . ولهم بهب الريح ذكر وطاري
هم للكرم والجود موطن و عنوان . وهم للشدايد والفزع والكراري
منطوقهم أرحب وحييت يا فلان . تلقى التحيه من كبار وصغاري
ما جور منا و السلامه و الإحسان .كيف أنت ، طيب ، ويش حالك عماري
أرحب وقلط لك على حيل سمان . وتلقى العلوم الغانمة بانتشاري
محزم وجنبيه زهت فوق الاردان . وعصبه على الراس تلف وتداري
رجال يام أن جيت شيبه و شبان . نعم بهم وان حل فيهم طواري
ربع لهم بالحزم و الموزمه شان . سواطيا يشرون موت الحمادي
وأنا أشهد أن الطيب كله بنجران . شهادة ما هي لبايع وشاري
هذي شهادة حق من قلب ولسان . ويالله عسى قول الحقيقة شعاري
و الحمـد لله كلـنا بأمـن و أمـان . بالمملكة عم الرخا والوقاري
الــه الثنا و الشكر منا و عرفان . ساد الأمن والأمان مدن وصحاري
ترعى الغنم بجانب الذيب سرحان . واستفلت الغزلان هي والحباري
بأرض السعودية جماعات واخوان . من وين ما وجهت الك افتخاري
وبالخاتمة صلوا على نسل عدنان . عد المطر واعداد رمل الصحاري
وأنا اعذروني إن كان بالقول نقصان. وتقبلوا أشواق شاعر شراري
30-05-2005, 05:32 AM
العرض المتطور
