يا رب صــبــرني
للشـاعــر الـقــديــر / حـمــد المـغــلــوث
ـــــــــــــــــــــــــــــــــــــــــــ
يا رب صبرني على امرك وبلـواك = واجبر عزا من شاف ضيم العزايـر
مثل الدريك اللي على حوض الادراك = يبكي ودمعه فـوق الأوجـان جايـر
يـا عيـن هلي ذارف الدمع سفـاك = وابكـي وهاتي ما خفـا من عبايـر
يـا عيـن لا تبكيـن هـذا ولا ذاك = الا ولا فرقـا الأهـل والعشـايـر
ابكي على سمح النبا حسن الاسـلاك = اللي عليـه مغـوزر الدمـع فايـر
قلبـي عليه من الولـع فيـه دكـاك = والحـال منـي خلصـت بالحسايـر
كني ربيط الـروم في وسـط شبـاك = ولا كسيـرٍ مـوجعتـه الجبـايــر
قدم العرب غادي بشـوشٍ وضحـاك = والكبـد يصـلاها لهيـب السعايـر
يالله يـا والـي تصاريـف الافـلاك = يـا مطفـيٍ نـار السنيـن العسايـر
يا مـن لعسـرات الشرابيـك فكـاك = والي السماء والي جميـع البصايـر
اسألك من جودك وفضلـك وحسنـاك = تجمـع بشملـي مع ظبـي الزبايـر
الجادل اللي يصقـل السـن بالـراك = حاوي محاسن محصنـات الخدايـر
سبه عزاي وصـار للـروح مـلاك = وارخصت له عمري وما بالذخايـر
يا زين روحي يا أريش العين تفـداك = حيثك هواي وعن هوى الغير ذايـر
علـي نـذرٍ إن ولـف الله بلامـاك = لا رزّ رايـات الفـرح والبشـايـر
واصـوم لله مـا تيسـر لعينــاك = وابنـي لحبـك بالضمايـر منـايـر
يا زين يا عـذب اللما كيف بنسـاك = والحب سلطانـه على الحـال جايـر
يا مورد الخديـن محلـى سجايـاك = يا سيـد كـلّ المترفـات النضايـر
يا زين شفني من غرامـك وفرقـاك = كنـي على جـالٍ من اليـم هايـر
سهرٍّ ونوح بنوح ورقٍ على الـراك = معـذا تصفقنـي ركـون العوايـر
يا بو محمـد يا فتى الجـود بنخـاك = يا فرحـة المضيـوم يـوم الكسايـر
شف لي طبيبٍ شاطـرٍ لا عدمنـاك = كـوده يـداوي علـةٍ بالضمـايـر
والا فنـا يا معـدن الجـود ويـاك = نركب على ثنتيـن عـوصٍ حرايـر
نركب عليهن يا فتى وقت الامسـاك = من دار أبو جابر عزيـز القصايـر
والعصر حول مريخ وبيمـة اشيـاك = ومنكبيـن المـزهــره والنقـايـر
يا بعـد والله يـا القعيمـي معشـاك = إن سلــم الله مردمـات الفقـايـر
يومين والثالث على الهـون ملفـاك = هجر منـازل من له القلـب طايـر
فيـلا لقينـا ديـرة الربــع ذولاك = الوصل يطفـي ما لجـا من زفايـر
وامسي لكني مـالكٍ كـلّ الامـلاك = امـلاك سلطـان البحـر والجزايـر
والـى لفينـا دافــع الله منـايـاك = مرخوص يا مروي السيوف الشطاير
الا ان يطيب الكيف لك فانت برضاك = اتـم انـا ويـاك للحـول دايــر
عند السياسب لابـةٍ مثـل شـرواك = الكـل منهـم يحتمـل بالخسـايـر
اهـل دلال كـالغـرانيـق ودكـاك = وحيـلٍّ تقلـط للـوجيـه السفايـر
يا بـو محمـد عـانك الله وعافـاك = وذراك ربـي من حتـوف الدوايـر
شفني من الفرقا ولا الحـال يخفـاك = مثل المريض انهض ولانيـب ثايـر
مـن فقـد طفـلٍ للمعاليـق مسـاك = الجـادل اللـي ما يـدوس الوزايـر
كامل تواصيفـه ولا هـوب حشـاك = الا ولا يــومٍ لقيتـــه مكـايـر
منـزهٍ عرضـة ولا هـوب دكـاك = بالشين حاشا ما سمع شـور شايـر
من صلب شغمومٍ ضحى الكون سفاك = لادما العدى يـوم اشتعـال الذخايـر
سمـحٍ سلوكـي ولا هـوب شكـاك = ومغفـلٍّ ما هـوب راعـي عبايـر
ربي كساه من المحاسـن والابـراك = ثـوب الجمـال وكمّلـه بالستـايـر
الخـد كـالقنـديـل واللحـظ فتـاك = يغري الضمايـر والذوايـب حدايـر
متعثكـلاتٍ يسهجـن روس الاوراك = مثل الدجى فـوق الردايـف نثايـر
علمي بشوفـه يـوم الاثنيـن هـذاك = قبـل المديـد بعشـرة أيـام زايـر
سلّم علـي وقـال بـالك وحـذراك = تفضي السدود ولو تشـوف النكايـر
واعرف ترى ما لي عزى عن ملاماك = الله يبـور بملـزمـة كـل بـايـر
لياك تطرينـي ولا جيـب طريـاك = عنـد العـرب والله عليـم السرايـر
وارجي عسـى ربٍّ بلانـا بهـذاك = اللي وداده في حشا الـروح صايـر
يجمع بشملي بأريش العيـن وهنـاك = هالعمـر خيـره لـو بقـى للودايـر
والختم صلى الله على المصطفى ذاك = محمـد المبعـوث مـا سـار سايـر
ــــــــــــــــــــــــــــــــــــ
صح لسان شاعرنا ،،، و سلامتكم
ـــــــــــــــــــــــــــــــــــ
24-07-2005, 12:59 PM
العرض العادي
