احدٍ يصوم ومطمئنٍ بداره

[الطائر المهاجر]

السلام عليكم
الشهر مبارك
وكل عام وأنتم بخير
سعدت بانضمامي لهذا الصرح الشامخ بشموخ إدارته ومشرفيه ومنسوبيه
مصافحتي لكم ، واحدة من عدة قصائد كتبتها عن هذا الشهر الفضيل لكنها
لاتخلو من الحس الذي يحمله كل مؤمن بما نعيشه من أوضاع..

احدٍ يصوم ومطمئنٍ بداره = واحدٍ يصوم وداخله خوف يغشيه
من غارةٍ بالجو تحرق صغاره= وتهدم عليه البيت لاشي يحميه
واحدٍ يصوم الشهر عنده فطاره= واحدٍ يصوم العام فالجوع حاديه
واحدٍ على اليمّه صلاته اشاره= واحدٍ معافى لكن الدين ناسيه
يصوم عاده مثل ربعه وجاره = قلبه حجر مالان وابليس مغويه
متناقضاتٍ في زمان الحضاره= والكل تايه ما لقى من يقدّيه
والقدس راحت مننا يا خساره= وهذا العراق اليوم بانت مواريه
والبعض منّا لو عياب جداره= ياثق بخصمٍ يضمر الشر ناويه
الخصم واحد عارفينٍ مساره = ما له امان ولو بعضنا وثق فيه
من يوم جانا النفط ياللخساره = الدين قفّى ما لقى من يراعيه
فاللي تمسّك به خطير انهياره = مما يشوفه فالزمن ما يدانيه
يبيه يترك ما بقى من شعاره = ولو قاوم التيّار يخسر تحديه
لا با عرب وش لون صرتوا حجاره= يلعب بها العادي على كيف يبغيه
لا انتم ملكتوا علم فيه المهاره= ولا انتم حميتوا دينكم من معاديه
ماشوف غير البهرجه والنظاره= نعيش وهمٍ والمعادي يغذيه
يستنزف الثروات باحلا قماره= قمّر علي عيونٍ تحبّه وتغليه
يسرق ذهب بابخس عروض التجاره= ويعطي قشورٍ تفرح اللي انخدع فيه
وهذي النتيجه وضعنا في انحداره= والغير روّح يبني صروح تحميه
المجتمع بالفرد يرسم مداره= وراسٍ بليّا اطراف ماعاش راعيه
واجب علينا لو نحس المراره= نبدا نتكاتف بالعزم فرض نبنيه
بالدين وحده نسترد الصداره= لا من هدر كالسيل محدٍ يوافيه
ماعندنا غيره أمل للبشاره = كلش تلاشى ما بقى شئ نخفيه
من لازرع ما ينفعه زرع جاره= ومن لاحسب للدرب تاهت خطاويه

[عيد بن شدقان]

وعليكم السلام ورحمة الله وبركاته
الطائر المهاجر
مرحباابك ومسهلاا
يالطيب ويسعدناا وجودك بيناا

من لازرع مـا ينفعـه زرع جـاره=ومن لاحسب للدرب تاهت خطاويـه

الله الله الله
يالطائر المهاجر
صح السانك واعتلاا شانك
ولاهنت
قصيده في منتهاا الروعه

وبماا ان القصيده لك تنقل لصدا المشاعر
ولك كل الشكر

[الجويّر]

واحدٍ على اليمّـه صلاتـه اشـاره
----------------واحدٍ معافى لكـن الديـن ناسيـه




عزالله انك على اسمك طائر 0 طرت ورحت وجبت لنا من لذيذ الابداع يالطائر



صح لسانك صح لسااانك على ابداعك اللي يعجز الوصف عنه




لاكن مثل جزالت قصيدتك هذي المفروض تقول اسمك حفاظ على القصيده من الاقتباس





تحياتي / الجويّر

[أحمد بن عكشان]

السلام عليكم ورحمة الله وبركاته

صح ألسانك ملايين ولاهنت وسلمت يمناك وننطر القادم أنشاء الله

وتقبل مودتى واحترامى

[الطائر المهاجر]

هلا بكم
ومشكورين على كريم حضوركم وتفاعلكم
واستخدام الإسم المستعار كان خلال فترة ماضية ، بحكم العمل ، ولأنه مضى عليه
سنوات وعرفت به ، فاستمريت عليه مع اضافة شاعر العثمانيات/ عثمان العبدالله.
وبالنسبة لحفظ الحقوق ، فطالما الشاعر يحتفظ بروابط قصائده ، فلا عليه..
لاهنتوا يالربع
تحياتي الطيبة

[عـزام]

الشاعر عثمان العبدالله


حياك الله يالقرم ويا مرحبا بك فى محلك..ويسعدنا انضمامك لنا وتواجدك بيننا.


وقصيدة اكثر من رائعه

تحكى الواقع من شاعر متمكن


صح السانك مدد لا عدد


ودام ابداعك

[انتحار]

الطائر المهاجر

بكل جديه وصراحه اقول

قرات القصيده لانها
معانقه باسمك ... لكلي ثقه بما يقدمه شاعر العثمانيات

لست انا من يشيد لك
فانت اكبر من اشادتي

ان انا تجرأت وعقبت

سألتزم "بسلم" الشعر واقول
صح لسانك

[اطياف الماضي]

من لازرع مـا ينفعـه زرع جـاره *** ومن لاحسب للدرب تاهت خطاويـه

صح لسانك اخوي

وحياك الله معنا

لاتبخل علينا بالجديد

تحيتي

[فيصل بن حجرف]

يامرحبا ومسهلا بالشاعر عثمان
وحياك الله في منتديات الجميع ونتمنى ان شاءالله ان يطيب لك المقام بيننا في هذا المنتدى
وصح لسانك على القصيده الأكثر من رائعه ولاهنت اخي القدير

[الطائر المهاجر]

يا هلا والله ويا مرحبا فيكم جميعا
وحقيقة يفتخر أي شاعر ينضم لهذا المنتدى الرائع
الذي يحمل اسم احد أهم القبائل العربية الأصيلة
ذات المجد العريق بملاحم بطولاتها الذي سجله التاريخ
بماء من ذهب.
اسمحوا لي أن اتقدم بجزيل الشكر والتقدير لأخي الكريم/ذياب
على كريم الحضور وحفاوة الترحاب والتفاعل الراقي
تسلم يالغالي
تقبل أطيب تحياتي
اخوك الشايب .. الذي لم يعترف بشيبه وأصر على
الدخول للساحة الشعرية ، بعد أن تفرغ لها.