وصوفه تعجز القيفان

الشلاقي عز · #1 31-10-2007, 11:19 PM

جمال الكون يا بندر لمحته و العرب رقاد =تجمع في غضيض العود و متربع بكرسيه

حشى لله ما جيته و لكن في ثلاث أبعاد =لمحته داخل التلفاز و الشاشات ماسيه

صدحت القول بلساني و عذته من نظر حساد=يشوفون الحلا كله و الاوصاف القياسيه

بنيه بس لا والله محد حوله بعاد غاد =تفوق عن الحلا العادي ب10 سنين شمسيه

تثنى عوده المياس و تلعب به هبوب أنواد=ليا ناظرت أنا شكله تقول أقواس عكسيه

شفاها جمرتين ارطى تشب بخافق وقاد=تقادح نارها يعجب ذوي ملة مجوسيه

وعينه عين ريميه تخزرك و العيون حداد=تفر من أرضها فزعه و كله زود حسيه

وخده ممتلي جوري ومسك وعنبر مع كاد=يزين البال لا شمه و تطرب فيه نفسيه

نحرها لا أقبلت وسعه يشابه خامة السجاد=و يشبه من قصور العز الأبواب الرياسيه

بياضه يا ولد نايف مزهى دون لبس قلاد=نهوده مثمرات به كما نبت الغلاسيه

خطاويها وهي تمشي تقل مربوطة بقياد =تشادي مشيت المحبوس في تهمة سياسيه

شعرها يشطره ردف وراها مكتنز يزداد=يا بندر وصفها كايد ما هي والله أنسيـه

حلاها نادرا جدا حشى ما قيل في بغداد=ولا احد يشبهه بالكون سوريه و فاسيه

تحير ناظري منها و فيها وأنقلب وأنعاد =ولا أدري وين أوجهها ولامن أي جنسيه

وصوفه تعجز القيفان تعبر كل ابو قصاد=بمدحه والغزل والوجد و ابيات الرومنسيه

سبت عقلي خذت قلبي ولا عيني هنت برقاد =سبايت عبلة لعنتر عقيد القوم عبسيه

تروح الروح من أجله بوقت به يصير طراد=بيوم فيه ضرب رماح و فيه الروح منسيه

يا بندر شفته البارح ولا عقبه يزين وساد =و نوحي من تنحت بس يشدي نوح قيسيه

يا بندر بحت لك سدي و جتك أبياتنا تنقاد=و مسك القول و ختامه تعذرن كان به سيه