طرائف شعريه ...!!

[فلاح بن ملبز]

السلام عليكم ورحمة الله وبركاتة


طرائف شعريه ...!!



(تهرب مالي)


حاول الشاعر سليمان الطويل التهرب من دائنه المسمى شبيب بالالتجاء للمسجد وماترك فرض ولا نافله الا صلاها
ليطيل في ذلك املا في ذهاب شبيب عنه ولكن دون جدوى .. وحين اتم صلاته قال :

صليت بالجـــامع وسبحت تسعين=مع كثــــرهن واتبعتهن بتهليله

وقـــــريت عـــمّ والمـــدثر وياسين=ادخل على الله مايخيب دخيله

وقريت وِردي عن جميع الشياطين=وشبيب ماسوى به الورد حيله

(سطو على البنك)


الشاعر حمود البغيلي فكر في سرقة البنك ولكنه احتار في النهاية .. لننظر ماذا يقول :

فكـــرت مرّه اســـــرق البنــك واعتاش=وصممت من قلبي انفذ قراري

وجهزت نفسي في مسدس ورشاش=ثم استعديت لجميــع الطواري

لكـــن قبل لا اســـــرق البنك وانحاش=احترت بين المركـزي والتجاري

(انتقام بشع)



لا أحد يعلم مالذي دعا الشاعر عبدالرحمن الحربي الى الدعاء بكل هذه الامراض على حبيبته .. ولكن ربما لديه سببه :

شخــــــصٍ هويته جعل ربي يسلّه=أصعب شلل ويكون مايوجــــد دواه

والا برص يضفي على الجسم كله=يبدا بوجهه ثم يمشي على اعضاه

والا مرض طاعــــــــــون حتى يفله=يسمع علاجـــه بس من دون يلقاه

ويصاب بالسكر وجســــــمه يسله=حتى المشي بالرجــل ماعاد يقواه

اللي بلاني وانتقـــــــــل من محلّه=وأنكر عهودٍ كانت العـــــــام ممضاه

لعابرة سبيل ايضا حيث يعجبها خبال حبيبها وتشتاق له وتقول :

ياخبلي الغايب متى تردّ للعين =متى أشوفك أو تجيني رساله

صحيـــح بالدنيا خبــــولٍ كثيرين=لكـــن خبـــالك ياحياتي لحاله

(تيس مندي)



للشاعره مرام الشوق حبيب مزعج فهو بالاضافة الى غبائه شره ومتخلف ويتضح ذلك من قولها :

لي قصةٍ مع صاحبي فلــم هندي=دايــم انا ويّاه فـ هواش ودموع

ودّه يســامرني على تيس مندي=وانا رقيقه ودي بازهار وشموع

خلّي غبي والعقــل عنده مصدّي=وبفن التخلف حايزٍ شكر ودروع

قلت له تطـور عيش باشا وافندي=الى متى وانت بتخلفك منزوع

قـــام وتلفّت قـــــال قومي تغدي=هذرتك واجد يوم انا ميتٍ جوع

(حزن على النعال)

كم هو الحزن الذي ينتاب من فقد نعيلاته .. ياويلي عنه ويلاه .. خصوصا اذا صار له معها عشره طويله
هكذا يعبر عنها الشاعر :

ياوجودي وجد من ضيّع نعوله=لاقيٍ وحــــده والاخرى مالقاها

عايشٍ معها من ايام الطفوله=شاب راسه بس نعله مانساها

(ارتكت للدركسون)


الشاعر سليمان الرشيدي يوصف بنيةٍ طخما تسوق سيارتها بهذه الابيات :

فلّت شعـــــرها وارتكت للدركسون=تضايـــقت كشناتها من شعرها

غريبة المظهر على الحسن واللون=حوريــــةٍّ كن القمـر في نحرها

كتــفٍ وردف وزول وحجاج وعيــــون=وآخر مديل الغانم ابيض شفرها

لحقتها صاحــــــــي وعوّدت مجنون=ملهوف ماعرف برها من بحرها

أخيكم


فلاح بن ملبز

[منصور الحيان]

صح لسانك والله لايهينك على النقل الجميل وتقبل مروري

[جطلي بن فهد]

الاخ العزيز

فلاح

لاهنت على هذه الطرائف
ويعطيك العافيه

[ناصر بن فالح]

خووش ابيات

لاهنت يافلاااح

[خالد بن رمثان]

أررررحب يبو محمد ولاهنت على الموضوع المميز

ياراعي التميز

وتقبـــــــ ل ـــــــــمروري

[شي_مرتب]

السلام عليكم ورحمة الله وبركاته

الغالي / فلاح بن ملبز


قواك الله على هذه الطرائف

[فلاح بن ملبز]

المشاركة الأصلية كتبت بواسطة منصور الحيان

صح لسانك والله لايهينك على النقل الجميل وتقبل مروري

ارحب مليون يا منصور

وصح بدنك

ويعطيك العافيه على مرورك الرائع

ولاهنت

[الاحرش]

صح لسانك

ويعطيك العافيه على النقل

ولاهنت

[موكب]

اخي الغالي فلاح بن ملبز

موضوع في غاية الروعه والابداع

اجدت وابدعت وغير مستغرب من شخصك هذا الشيء

صح الله لسانك ملايييين على هذه الابيات الطريفه

وسلمت يداك بما خطت لنا من ذوق جميل

تقبل تحيتي وتقديري لشخصك الكريم

[فــلاح]

ياسلااام



صـح ألســنت الشعاار


ولاهنــت يابومحمد على النقــل المميـّز