السلام عليكم
هذي ثلاث قصائد لصديقي الشاعر \ نقا الاسيمر المطيري
هاجس الذكرى ..
ياهاجس الذكرى علامك توني..
......... شيبت ولا لوعتك المسايير
لك في طريق العمر شي(ن) فتني..
......... اجيه لكنه بعيد المقادير
عليه من بيت البدو ذوق فني..
........ ستره ذراه وجارحته المعاصير
فوقه من الرمل الكفيف المغني..
........ كنه يقود من الصلايب مغاتير
وجنبه وقف ضلع(ن) طويل(ن) سكني..
........ ياحلو وقفة جابرات المكاسير
هذي حروف وشعروافكار جني..
........ اشبهك لكن قليل التصاوير
وان قلت كلمه صرت للعمر كني..
....... جذع(ن) تهادى عيبته التجابير
الوقت توهـ وان قضا الوقت عني..
....... انساه لكنه يجيني مع الغير
والصاحب اللي خابره ما يحني..
...... دوني ودونه مبعدات المشاوير
ان كان خيب فيه والوقت ظني..
...... سكه قصيره وانتهت عند تفكير
والبدو لا قفو نسو من نسني..
...... عني وانا شبل الرجال المناعير
___
لحظة افراق ..
همي انسكب في دفتري لحظة افراق ...
................ وزاد القلم جرحي وانا كنت خايف ...
هلت دموعي..طيب وش حال الاعناق ...
................ واهتز صمتي بين حايف وحايف ...
ازريت اشيل الجرح لو ضقت ماضاق ...
................ يسحب شليله في سما الهم طايف ...
بعثرتلك اوراق \ وانهيتك اوراق ...
................ واهديتلك حبـ(ن) \ وتهدي صلايف ...
ليت الهواتف كلبوها على إغلاق ...
................ لجل أتناسى من على البال نايف ...
أشراق من عقبك ؟ حشى مابه أشراق ...
................ وليل الشقا ينثر همومه حسايف ...
أكذب عليك ان قلتلك صرت انطاق ...
................ حتى عيوني تنظر الشي زايف ...
ابنسحب يمكن مع الوقت تشتاق ...
................ وتشتاق لي شوق العمى للنوايف ...
.......
متاهات الدروب ..
انا والليل والقمرا وجرحن مـع شقـى ملتـم
نسولف بعضنا يشكي ويحكـي عـن خوافينـا
نسولف عن متاهات الدروب اللي بنـا تهتـم
نسولف والامل يسـرع ويستعجـل خطاوينـا
تهب الريح في ضلعن عليه من القهـر علقـم
وتتقفـل صناديـقـه ولا يلـقـى مذاريـنـا
بكيت الحب من شانه وسالـت دمعتـي لليـم
نسى بحره..نسى امواجي..نسى حتى شواطينا
هجرت الصبح من بعدك..غديت بدنيت(ن) تظلم
تبعثـر كـل مافينـا .. تشتـت كـل امانينـا
ألملم جرحي الباقي .. ألملم مابقـى مـن هـم
اغوص افـبحر اوهامي ولا ادري وين يرسينا
شكيتك أأه وش باقي على صبح(ن) سواله كم
بنبقى في ظلام الياس وليـل اليـاس يشقينـا
ترى جرح الوفا اصعب من جروح الزمان الغم
يعجل فـي مفارقنـا ويصـرخ فـي تباطينـا
وانا والليل والقمرا وجرحن مـع شقـى ملتـم
نسولف والامل يسـرع ويستعجـل خطاوينـا
24-12-2008, 11:21 PM
العرض المتطور
