قصيده رائعه للشاعر المبدع حمد بن هادي الماس العجمي
إنسان لي مبدا على كـل شيمـه = ويش ابن آدم لا حيـا دون مبـداه
أعيش في دنيـا بذكـرى أليمـه = وأصبر على قلب شكى كل ما جاه
مثل السراج إن ضاح ليله ظليمـه = لو طال ليلِه آخـر الربـع طفـاه
ولو جار وقتي دوم نفسي كريمـه = أكبح جمـاح الشـر واقـول يالله
في وقتنا ما عـاد للطيـب قيمـه = وطبع الرذيله سوق ذا الوقت غلاه
امـر بأيامـه مثـل مَـر غيمـه = تمطر أو إنها في سِكـات اتّعـداه
والثوب أبيـض والنوايـا سليمـه = لين الكفن الأبيـض تلاقـا ثنايـاه
أجنب دروب النفـوس السقيمـه = والطير يهبط حول شكله والأشباه
والعقل زينه ويل من هو عديمـه = واللي يطاوع قلبه تضيـع دنيـاه
ولا خير في خـلٍ يخلـي نديمـه = بعد الوفا والطيب بالبعـد يجفـاه
ما يعرف ان ذبح المشاعر جريمه = لا كسّر أمواج الغلا دون مرفـاه
راح وتجاهـل ذكريـاتٍ قديمـه = والخاطر اللي يحتفي يـوم يلقـاه
حسبي عليه الله وربـي خصيمـه = ما أسامحه دام الشراييـن تهـواه
بأستر جروحي بالصبر والحشيمه = وبا عيش دونه مثل ما عشت وياه
وباعيش لي مبدا على كل شيمـه = وعزي لمن وقته غدر به وخـلاه
تـمّـت
07-03-2010, 03:20 AM
العرض المتطور
