أسعد الله اوقاتكم جميعا
هذى قصيدة قريتها وأعجبتنى وأرجو أن تنال إعجابكم
وهى للشاعر المتألق مــاضى العضيمان
ياصغيره غرّك العز والقصر الظليل=فوق سجاد المعزه وبكفوف الدلال
اسمعي لابارك الله في الحظ البخيل=والرفاهيه وفهم العرب والانحلال
قبل اعرفك مااعرف الحب واقنع بالقليل=ومن عرفتك وانتي كنوز مال وراس مال
الخطا ماهو خطا عاشق الطرف الكحيل=الله اللي ميّز الحسن ويحب الجمال
والجميله يوم تعشق لها عاشق جميل=تفتخر به زود لاصار من روس الرجال
اعشقيني عشق (عفرا) لـ (عروه) والدليل=اني آعشْقك وظلمك غدى عندي عدال
جعل ربي مايفرق خليلٍ من خليل=لين يوصل كل واحد على حد الهبال
بنهبل بك لين كلٍ يعرف اني هبيل=وانتي انهبلي بحبي وزوديها خبال
خلّي العذال تمسي على حر المليل=وان بقى ثلثٍ من الليل ياحلو الوصال
ودي بحب المعنّق وشرب السلسبيل=والظما مايقطعه (ما) شفايفْك الزلال
كل مااشرب ودي اظما واظمك حيل حيل=ودي نحل القضيه ولو طال الجدال
الوعد مقصورة العشق والمقصد نبيل=وش نسوي والله ان حن نبي الدرب الحلال
الهوى ناسه مجانين جيلٍ عقب جيل=واكثر احصائي ضحاياه من قيلٍ وقال
ألـبسي في كل طلعه معي آخر موديل=ابغي افقد لا انثنا عودك الناعم ومال
الله الله ماازين الطول وأوماي الجديل=وانهزاعٍ بين خطوه وخطوه واعتدال
وخصرك المَزْوي يخلي الرجال بلا دليل=وردفك وصدرك وجسمك وحلو الانعزال
والعيون الدعج والخد والعنق الطويل=والكفوف المترفه والمعاضد والكمال
لبّا والله قلبك وقدّك الغظ النحيل=يا اجمل انثى غطت الحسن في بشتٍ وشال
سوقي الاقدام صوبي وعضي بالشليل=اسرعي مشتاق لك حيل مافيني احتمال
ان تضايقتي من الليل قولي له ياليل=وان صلح لك تالي الليل قولي عال عال
وانتخيبي ويغدي (وادي العجمان) خيل=عاشقك ساسه على العز عمّان وخوال
ليلٍ وخيل وغرام وميادين وصهيل=لعنبو من ردني وقتها (انا اخو العيال)
قولي : الحقني يا(ابومبارك) بقوّه وحيل=والله ان تعقد لك حبال وتقطع حبال
وانتزع لك راس شيخٍ من الوزن الثقيل=واقطع الفرجه واعل المواريد الطوال
انتي ام الروح والروح ماغيرك بديل=يعني انتي بس من صال في قلبي وجال
رزتك هيبة حكومه ومنطوقك ذليل=رمشك احيان يتجرا وبعض احيان ذال
ياصغيره..لحظه! افكاري الشرّد تخيل=ودي اسولف شعر دامني واسع خيال
خاطري في قاع مافوقها سدر ونخيل=ولا تمرّك لافتات (انتبه معبر جمال)
قاع شبعانه من الورد والانهار سيل=ماتشوف الا حمامة مراسيل وغزال
لانظرتك وانتشيت الهوى الطلق العليل=ثم تشابكنا الايادي وغنينا يالال
في جبل ناخذ لنا(سويت) في افخم اوتيل=شرفته على البحر والبحر خلفه جبال
مشهد (الجو وغرامي معك) ماله مثيل=تعجز انتاجات (هوليود) ترسم له مثال
جعل يومٍ فيه فرقاك يبقى مستحيل=والجفا بيني وبينك مايلقاله مجال
يابعد روحي وياراس مالي والحصيل=الوصيه..لا انبرا الحال زوريني بحال
ولنجرحت من الزمن يوم واعلنت الرحيل=واصليني واستمري معي على اتصال
يابعد من هز قلبي ولا خلاّ نزيل=ويابعد من حط وسط المعاليق الرحال
وسـلامــتكم
24-08-2004, 04:02 AM
العرض المتطور
