هذه قصيدة الشاعر المبدع \ سالم عبيد العرجاني
عديت عصر الخميس المرقب العالي = وجريت صوتي مع ذعذاع شرقيه
من واهج بالضمايركاوي صالي = وسط الحشا موقد بالقلب صاليه
حديت رجلي على المشراف يالغالي = وحديت سالم يجر الصوت عصريه
ماجر صوته كذا من واسع البالي = يجر صوته عقب كثرة طواريه
يجيب جرح الهوا في كل موالي = ويجاوب الورق بالونات جهريه
ياوجد حالي وجود النازح الجالي = جلوه ربعه عن الاوطان جبريه
خذ له ثمان سنوات في الخلا الخالي = لا شاف ربعه ولا له صوبهم نيه
قضى حياته تعيس بين الاهوالي = لين انتهت رحلة المسكين خاليه
ذا وجد حالٍ عليه الهم متكالي = من سبة الي كواني وانجح الكيه
الصاحب الي يجر القلب بحبالي = حبال حبٍ على الميثاق مبنيه
ابطى غيابك ودمع العين همالي = خليتني للهوا يازين ماريه
لاعاد ذكرٍ ولا جا منك مرسالي = الين راحت حياتي تحت عاديه
انا دخيلك تعود ياهوى بالي = اقفيت والعين من عقبك شقاويه
ليتك تروف وتشوف الحال ياحالي = وتشوف حالٍ من الهجران مطويه
الله يعيده نهار اثنين شوالي = اول ملاقا عشيري فالخلاويه
في فيضةٍ لادعج العينين منزالي = من يومها روح سالم فيه مبليه
لو غبت لو رحت عهد الحب مازالي = في روضةٍ عن جميع الخلق محميه
وان كان هذا معك مكتوب غربالي= طالبك هاك الغلا لو كان عاريه
السياسي
17-07-2004, 08:51 AM
العرض المتطور
