,
صباح الخير .,
تواصل ربيعي : )
حي ذا الطاري وذا العين من شوف الربيع
..................... وجعل يسقى لا سلت نفسي من احزانها ,
الخيام بصهيدٍ كنّه ( الروض الوسيع ) ,
..................... ثبّتوا بـ أطنابها .. وعدّلوا عِمدانها !
( سِعد عيني ) والله يبيّض وجيه الربيع
..................... زيّنوها زين .. والزين .. في زيّانها !
الطرب في ( هبّة الريح ) و ( الذوق الرفيع )
..................... وكل نفسٍ ( تنطرب ) لا لقت خلّانها ,
ضوّ .. ودلال .. وشراع .. وسوالفٍ من صديع
..................... والمعاميل تغلي .. والحليب اوزانها .!
( ليلةٍ قمرى ) ونسناسها ( فوق البديع )
..................... حاذفين ( همومنا ) .. ودينها .. لـ ديّانها !
والمسيّر لا بغى الوصف ؟ ما والله يضيع !
..................... قلت له : شف خيمةٍ تجهرك بـ ضيّانها
يمكن انك تشوفها وانت ( بالخط السريع ) ؟
..................... ( ضوّنا ) .. شبوبها .. ماهدى .. ( دخّانها ) !
الفطور ( كبيدةٍ ) .. وإنتخاشرها جميع
..................... والغدا ( كبسةٍ ) .. غايبٍ شيطانها .!
والعشا ( لبيني ) كن لحمته بيدينك تميع
..................... وجمعة رجالٍ على الطيب .. يزهى شانها
والسهر سمرة علومٍ ( برضوان السميع )
..................... والقصايد ( جزلها ) .. والهروج ( سمانها )
والله إنها ( شّف ) من كان له جرحٍ ضليع
..................... غير الاعمال .. بـخواتيمها ميزانها .,
إنكشف همٍ سترته عن العالم جميع ؟
..................... ( وإذبحتني عبرةٍ ) متّ من كتمانها .,
كنّ همٍ ساتره ؟ ( جادلٍ ) ترعى قطيع
..................... يوم ناطحها الهوى .. بيّنت سيقانها !
( الهقاوي خابت ) وطاح راعيها ( صريع )
..................... والبنادق خافتت .. وأخطت بـ نيشانها
الحمل بين الحنايا .. ماهو بـحملٍ وديع ؟
..................... والعباد إللي إبتلت .. زادت بـ إيمانها .!
والله إن بعض الرياجيل في ( حسن الصنيع ) ؟
..................... ودّها بـ الغانمه .. غير .. مالله عانها .!
المراجل ماتجي عند ( عيار ) و ( لكّيع ) ؟
..................... والأصيله .. ماركبها .. ياكود حصانها !
آتحاشى ( أهل النميمه ) ولا أسمع ولا أطيع ؟
..................... خابرن بـ أن الصمت ( يكفلني بـحقرآنها ) ,
( غربة الانسان ) ف ديرته .. شيٍ مريع
..................... كنّه رايح ( وجهةٍ ) .. ماعرف عنوانها
( الكرامه ) ثروة إللي يبي القدر الرفيع
..................... وواحدٍ ماعزّ نفسه .. ترى هو هانها
لعنبو من لام ( شالح ) على فرقى ( الفديع )
..................... من يلوم العين ؟ لافارقت .. ( حيّانها ) ؟
ياكثر صبرك على الظيم ( يالصدر الوسيع )
..................... وياكبر حزنك على الحاجه .. وفقدانها !!
كن بيني وبين بعض العرب ( سدٍ منيع ) !
..................... وكنّ مابيني وما بينها .. ( بيبانها ) ,
الهنوف إللي جذبتني من الطرف الفضيع ؟
..................... وش جنت من ( سفك دمّي ) بسحر اعيانها ؟
أقبلت مثل البراءه على ( وجه الرضيع )
..................... وأدبرت مثل السفينه .. مع ربّانها !
( القناعه ) سلعةٍ من شراها مايبيع ؟
..................... والنصيحه ( درةٍ ) غاليه بـ أثمانها !!
يازمن حمّلتني فوق ما لا أستطيع
..................... آآآآآه لوّ تدري بروحٍ ( طغى حرمانها )
والذي بيديه نفسي ! وقلبي له ضريع ؟
..................... ان نفسي ماشكت غير ؟ من عصيانها !
( العزا ) بأن الجماله لـ أهلها ماتضيع ؟
..................... دام ربيّ يجزي النفس ضعف حسانها
ماعرف قدر الوفا غير من قلبه شفيع ؟
..................... ولا عرف قدر الامانه .. سُوى من صانها !!!
مخرج :
يامن ثمل ناظري من ( لونك الخمري )
اعرفك وقت ( الرضا ) و ( الزعل ) من طلّه ؟
إليا رضيتي عليّ ؟ قلتي : هلا عمري !
وإليا زعلتي عليّ ؟ قلتي : هلا والله 
!!
( عازف الضاد )
سعود بن مهدي 
لكم 
,
14-12-2011, 06:02 AM
( تواصل ربيعي ) ليلةٍ قمرى ونسناسها فوق البديع = حاذفين همومنا .. ودينها لـ ديّانها
..~
![الصورة الرمزية [ عسّاف خيل ]](image.php?u=35851&dateline=1346813190)
![[ عسّاف خيل ] غير متواجد حالياً](images/statusicondev/user_offline.gif)
العرض المتطور
