الله على اللي شفته يـوم الاثنيـن
في شـارع فيـه الخلايـق تزاحـم
ساعة لحظته قلـت بالله يـا زيـن
أرفق علـى قلـبٍ همومـه تلاطـم
ترى بي جروح مـن العـام للحيـن
لا تفتـح جـروح نبيهـا تـلاحـم
قال : أنت غادي قلت غادي ومسكين
بس أنتظر خـل المشاعـر تناغـم
قال : أنتبه للهرج وأعرف معك مين
لا تحسبني صرت بأصبعـك خاتـم
إلا أنت وش دلك دروب المحبيـن ؟
وش طببك بحر الهوى والمنـادم ؟
قلت العفو يا كامل الحسـن والزيـن
أنـا بخيـصٍ بالمعـانـي وفـاهـم
الحب مـا يعـرف فقيـر وغنييـن
من عهد قيس اللـي تعلـق بفاطـم
إن كانهـا بالمـال حنـا فقيـريـن
وإن كانها بالعشـق فحنـا نزاحـم
وإن كانها بأنسابنـا فــ والنعمين
حنـا لنـا مجـد عظيـم وملاحـم
ويومه سمع قولي حلف لي يمينيـن
إنه علـى مـا قـال بالحيـل نـادم
وأغضى بعينه وألتفت قايـل ويـن
أسمك ورقمك يمكـن إنـا نتفاهـم
وسلامتكم
29-01-2006, 02:53 PM
العرض المتطور
