السلام عليكم والمعذره لطول الغياب لبعض الظروف..
واهدي لكم قلتها قبل وقت بأبوخالد وهذا أول مره أنشرها..
وليد الفود
سقاني شعري العابر على كيفه بليّا اعهود
وقال اليوم أشوف انك نسيت اشلون تشكيلي
عطيته وصف من حالي وعن أحوالي كمالماجود
وأقول اليوم أشوف انك نسيت اشلون تدعيلي
وأنا لامن بغيت أشعر هجرني وقال أنا ملدود
على كيفه يشفّقني وعلى كيفه غدا شيلي
بغاني أروي احياضه على زينة بنات الذود
على شوف الفياض اللي عقب رش مع سيلي
في وسط الروضه الخضرا نزل فيها خيار الجود
تلاوفها خباريها ويدوج ابها من الحيلي
وأنا من صافي النّيه بديت ابها بدون احدود
بديته للي يسمعلي وأحسبه كان يصغيلي
وجيته بالحكي مره وعدت القول له مردود
وزدته طالب حاجه عساها دوم تقضيلي
أشوف أنه تناساني وتناسى المعرفه بالزود
وأشوف أنه نسى وقته على ذالصوت يعنيلي
وعدني وقال أنا ناسي وعطاني بالعذر معهود
أبي صوتك وأبي منك ولكن لاتشاكيلي
أبي منه وكل مره يجي سد وراه اسدود
عسى ما شر تجي منه ولا هو مضوي ليلي
وطولة بالي يا ناسي غدت لي بالصدر كالعود
تعبت العمر يالايم وقال الوقت ياويلي
حلفت اني ماصوت له عساني دوم له ماعود
عسى الله يبعد المنّه من ارجال مشاكيلي
وأنا مالي من المنّه ولاني من نكر بجحود
أعرف العرف وأعني له ولو شفته يعاديلي
ألا يالله لا تجعل أمانينا رجا وانشود
ولا تجعل لنا علّه من ارجال مهابيلي
نويت أرحل لأبو خالد وأقول ان كانه المشهود
وليد اللي عرف عنه يزيد البن والهيلي
وأعرف أنه يعين اللي غداله عسر ويّا صدود
وأعرفه ما يخليني وعسى الفرصه تماشيلي
نخيت القرم أبو خالد ينوّرلي الليالي السود
ولا يجعل لنا حاجه من أشكال التماثيلي
أنا أشهد ماكذب قولي أشوفه راقي بسنود
ترى العليا تجي صوبه تسرّجله من الخيلي
يعرف الرجل من شكله ولامنه لفاه ايعود
ويعرف الدّرب وين أصبح ولو ماله مداخيلي
سبقني الذيب ياسامع بمدحه للوليد الفود
وكل بيت يجي منه يعقّل كل ما قيلي
وأنا مقدر أقول أني أجاري من بيوت العود
عجز مدحي يجي مدحه ولو طالت محاويلي
وأنا وقتي غدا مني وصار الكف لي ممدود
أبي منهو يصافحني ويقول أنه يحاميلي
أبختمها على كيفي وأبدعي ربي المعبود
يزينها على فالي ويعدل شي من ميلي
فهد بن كليفيخ
10-06-2007, 11:10 AM
العرض المتطور
