الشاعر مسفر بن حسين آل عمر يرسل قصيده الى الشاعر وليد بن رسمه آل عمر
صوت وصدى فتل ونقض وجزاله بين الشعراء حبيت انقلها لكم
قصيدة مسفر يقول :
السلام ورحمة الله وبركاته يا وليد=كل باب وله جواب وكل شي وله سبب
والله انك يا بن رسمه بين ضلعي والوريد=وساعة ٍ فوق العقال وساعةٍ بين الهدب
يا ولد من قلبه أقسى في الشدايد م الحديد=ان نوى يجهم بساعة وان وصل يالا العجب
لو تبيد اجا وسلمى والله انه ما يبيد=يا كثر ما قالوا ميده سلمت ايدك في العطب
المواجيب اشهدتله والقريّب والبعيد=والميادين انشدوها في الملاقى من كسب
شامخ وكن المراجل تحت رجله له عبيد=ان سكت نشفق لصوته وان هرج هرجه ذهب
جعل من يجحد جميلة يا بن رسمه ما يفيد=جعله أول من تنادوا فوق قبره بالنصب
ما اتعبه طراد جاه ولا اشغله جمع الرصيد=اول الدنيا وهبها واخر الدنيا وهب
وانت مثله يا وليد ولا فرقك اللا القصيد=واذكر انه في حياته كان يعلمك الادب
كان يلقنك المبادي يشطب بيومه ويزيد=والأسد قالوا تفوق والشبل قالوا رسب
جبت ذنب غير كايد.. بس يمكنه مكيد=م الذنوب اللي تغفرها عمرةي بآخر رجب
جاتني منك علوم يا بن رسمه ما تزيد=ما تهز اللا الرجال وما تزيد اللا الغضب
باعتبر كلمتك عدت وابتدي يوم جديد=وللاسف يرجع واقول المشكلة نبقى عرب
كني ما اوحيت الكلام وباعتبر قلبي بليد=وبنصحك لا شفت ناري لا تزودها حطب
لو تناشبنا من اللي يا بن رسمه مستفيد=الله انه لا يوقع بيني وبينك نشب
وانت تدري يا وليد اني لا شفتك يوم عيد=وانت تدري من عرفتك وانا مبشر بالشبب
انت تاجي فوق راسي وانت في الشده عضيد=حتى لو هرجتك فيني والله انك اطلق شنب
كلمتك ما اطرد وراها وانت ما مثلك طريد=وقبل تقفيل القضية باقي عندي طلب
وانت تعرف وش بقول وعرف ان رأيي سديد=وتعرف ان الجود يبقى والجرب يرث جرب
قفل الموضوع وانهه قبل تبلش يا وليد=لا تحسب ان المغازي من حوانيت الطرب
والسلام ورحمة الله وبركاته من جديد=قلت ورّد يا قصيد وقال ورّد يا سبب
.
.
.
.
ورد عليه وليد بن رسمه وقال :
مرحبا بك يا مسلم في سلوم أهل النشيد=كل سيفي له نصاب وكل راس له ذنب
يارفيقي لي غلاه العام في قلبي وحيد=لين جلب له علوم ما وراها الا التعب
من جهل حكمت زهير ما عرف سيرة لبيد=والمعاني من تغره ما نلحقه العتب
الذلول اللي سرت بخطامها من غير قيد=ازهلوها يا قروم القوم لا مس الحقب
والله ان تبرك ويفتر حيلها وانا وليد=لين ناسم خدها وسم تناقله العرب
مسفر يومي عصاه ولالزم فالكف حيد=وسطوة الحكام فالاعراف بالسيف الحدب
غير مثلك لا يميل ان مالت أغصان الجريد=يا نسل من يفعل الطولات وعدوة عقب
يا ولد من يكرم الضيفان فالوقت الزهيد=يوم غيره يحسب الأموال كفه ما حسب
يا عسى عزه يدوم ويجعل عمره مديد=شايب ذكره مثل شمس الضحى ما تنحجب
السوالف لو تجينا من عجب وإلا سعيد=وش علينا من سعيد وش علينا من عجب
يا مفسرة الحلوم ويا مشاويك الضديد=يا معيلين الضعوف ويا مطوعة الصعب
ساسها ساس هشاش وزولها زولي فريد=واكثر الازوال كنه مثل عمدان الخشب
انت يا اللي تحسبنك صرت هارون الرشيد=دام ثارت عدتك وش عاد نبغاً فالقصب
خابري باسك شديد وخابر راسك عنيد=فيك من صبر الرجال وفيك من عرف العزب
يا بن عمي لو خذاك الموت ما قلنا شهيد=جعل قبرك من ورى دار الصياعر والكرب
البيوت الهادفة مثل الهرم فارض الصعيد=والجبال الراسيه ما هزها صلف المهب
والشدايد ما لها الا واحد صلف وشديد=والقصايد ما لها الا من يثمن لا كتب
والمغازي حبكها خله لبن صمه دريد=والرسول محمد وتبت يدين ابولهب
والجرب يرث جرب والجود من ساسه جويد=قلتها واقولها والذيب يسبر لاقنب
ومرحبا بك يا مسلم لاتزيد ولانزيد=قال ورد يا قصيد وقلت ما عنده سبب
وسلامتكم
15-06-2008, 01:32 PM
العرض المتطور
