ياكثرهم .. لا قلت لك .. عرفة وجيه=وياقلهم .. لا قلت .. قـدر ومعـزه
رجلٍ .. تعزه بعد ماتلتقـي .. فيـه=ورجلٍ .. قبل ماتلتقي بـه .. تعـزه
ورجلٍ .. ترزه بالمجالـس مباديه=ورجلٍ .. فلوسه بالمجالـس تـرزه
ورجلٍ .. يموت ولا يجيبون طاريه=ورجل ٍ .. يجي طاريه في كل حزه
ورجلٍ يهزه .. بعض موقف ويشقيه=ورجلٍ .. مهوب أيّات موقف يهـزه
ورجلٍ .. ضعيف .. ويستفزه معاديه=ورجلٍ .. كلام اعداه .. مايستفـزه
ورجلٍ .. تلزه يعترف لك .. بخافيه=ورجلٍ .. على خافيه .. ماحدٍ يلـزه
ورجلٍ .. يوزونه .. ويزعل بنيخيه=ورجلٍ .. يزعّل من يحاول ، يوزه
ورجلٍ .. تكزه لازم انك .. توصيه=ورجلٍ .. بليّا ما توصيـه .. كـزه
من لا فرش .. للمرجله .. ماتغطيه=ومن لايخز .. الناس .. ماحدٍ يخـزه
ان كنت تعرفني فهي .. عرفة وجيه=مو شرط لك بالقلب قدر .. ومعـزه
شعر خلف المشعان
10-11-2008, 02:04 PM
العرض المتطور
